«Aqtóbe» endi Konferentsııa lıgasynda synǵa túsedi

ASTANA. KAZINFORM — «Aqtóbe» fýtbol komandasy búgin UEFA Eýropa lıgasynyń birinshi irikteý kezeńinde Polshanyń «Legııa» (Varshava) komandasymen qarymta oıyn ótkizdi.

Kezdesý barysynda aqtóbelik fýtbolshylar belsendi qımyl kórsetti. Oıyn barysynda qarsylas komanda mańynda jıi shabýyl uıymdastyrdy. Dese de birinshi kezeńde tablodaǵy esepke ózgeris engen joq.

Ekinshi kezeńde de aqtóbelik komanda gol soǵý múmkindigin izdedi. Alaıda oıynnyń 91-mınýtynda polshalyq klýbtan ıÝrgen Elıtım qorytyndy esepti belgiledi.

Osylaısha «Aqtóbe» qarsylasynan 0:1 esebimen jeńilip qaldy. Birinshi oıynda da olar polshalyq komandaǵa dál sol eseppen ese jibergen edi. Saldarynan aqtóbelik klýb Eýropa lıgasyndaǵy joryǵyn erte aıaqtady.

Endi olar Konferentsııa lıgasy ekinshi irikteý kezeńinde Chehııanyń «Sparta» klýbymen oınaıdy. 
Eske salsaq, budan buryn almatylyq «Qaırat» UEFA Chempıondar lıgasynyń birinshi irikteý kezeńinde Slovenııanyń «Olımpııa» klýbyn (1:1, 2:0) qapy qaldyrdy.

Aıta ketsek, shymkenttik «Ordabasy» fýtbol komandasy UEFA Konferentsııa lıgasynyń birinshi irikteý kezeńinde Grýzııanyń «Torpedo» (Kýtaısı) komandasyna (3:4, 1:1) ese jiberip, jarysty erte aıaqtady.

Al elordalyq «Astana» atalǵan týrnırdi ekinshi irikteý kezeńinen bastaıdy.