Aqtóbe emhanalarynda dárigerlerge mobıldi qosymsha arqyly jazylýǵa bolady

AQTÓBE. QazAqparat - Aqtóbede dárigerlerge kezek kútip otyrmaı, mobıldi qosymsha arqyly jazylýǵa bolady. Búgin jumys saparymen Aqtóbege kelgen Premer-Mınıstrdiń orynbasary Asqar Jumaǵalıevke №3 emhanadaǵy tsıfrlandyrý jumysy tanystyryldy, dep habarlaıdy QazAqparat tilshisi.

Aqtóbede emhanaǵa kelgen adam arnaıy talon alyp, ýchaskelik dárigerge barady. Sonymen qatar, arnaıy mobıldik qosymsha daıyndaldy. Ol dárigerge jazylýǵa, analızderdiń qorytyndysyn alýǵa múmkindik berip otyr.

«Biz mobıldik qosymsha týraly aıtyp, túsindirgenimizben, adamdar birden qabyldaı almady. Sondyqtan bilikti mamandy bólip, emhanaǵa kelgen adamdarǵa túsindirý jumysy jeke júrgizilip jatyr. Jastarǵa óte yńǵaıly. Mobıldik qosymshany tólqujat arqyly tirkep, emhanaǵa suranys jiberiledi. Qabyldaǵan soń dárigerlerge jazylý yńǵaıly. Úsh aıdan beri osy baǵdarlamamen jumys istep júrmiz. Sońǵy bir aıda 140 adam júktep, qoldanyp júr», - dedi emhananyń bas dárigeri Jánibek Narmuhamedov.

Mobıldik qosymshany túsindirý, jarnamalaý jumystaryna medıtsınalyq kolledj, ýnıversıtet stýdentteri jumyldyryldy.

«Memleket basshysy Nursultan Nazarbaev baǵdarlamany daıyndap, ony túsindiretin, iske asyratyn mamandardy oqytýdy tapsyrdy. Sol kezde ǵana joba Qazaqstan boıynsha qoldanylady, iske asyrylady. Tsıfrlandyrýdy engizýmen qatar ony belsendi paıdalana bilý mańyzdy. Emhanalardyń bárinde arnaıy maman bolýy shart. Áıtpese, tsıfrlandyrý jumysy uzaqqa sozylady», - dedi Premer-Mınıstrdiń orynbasary Asqar Jumaǵalıev.
 

Aıta keteıik, Aqtóbe oblysy boıynsha medıtsınadaǵy tsıfrlandyrý 72 paıyzǵa jetti. Osy jyldyń 15 sáýirinde bul kórsetkish 100 paıyzǵa bolady. Qazirgi ýaqytta qyzmet kórsetýdiń 18 túri boıynsha qaǵaz qujattar emes, elektrondy qorytyndylar júrgiziledi. Ári oblys ortalyǵynda rentgen synamasy plenkaǵa shyǵarylmaıdy, elektrondyq nusqada beriledi.