Aqtóbe ekologteri birneshe kúnnen beri gaz ıisiniń qaıdan shyqqanyn anyqtaı almaı jatyr
AQTÓBE. KAZINFORM – Aqtóbe qalasynyń shaǵyn aýdandary men turǵyn alabynda gaz ıisi shyǵyp tur. Ekologter birneshe kún boıy reıd júrgizgenimen, qaıdan shyqqany anyqtalmady.
Aqtóbe qalasynda apta basynan beri gaz ıisi shyǵyp tur. Turǵyndar áleýmettik jeli arqyly ǵana emes, ekologterge de shaǵym túsirip jatyr. Oblystyq ekologııa departamentiniń mamandary birneshe kún boı túnde de, kúndiz de arnaıy qurylǵymen ólshedi. Apparat eshteńeni anyqtamady.
- Birer kúnnen beri kúndiz de, túnde de ólshem jasalyp jatyr. Altyn orda, Turǵyndar qalashyǵy, 8-shaǵyn aýdany men qalaǵa kireberistegi 41-razezde de ólshem jasaldy. Gaz ıisin sezemiz, biraq arnaıy qurylǵylar eshteńeni anyqtamady. Tipti «QazaqGaz Aimaq» AQ-na habarlasyp, biz bilmeıtin bir jerden gaz shyǵyp jatqan shyǵar dep aıttyq. Alaıda kompanııa ony joqqa shyǵardy. Búgin ekologter, gaz taratýshylarmen birge ólshem jasady. Onda da eshteńe tabylmady. Departamentte gazoanalızator qurylǵysy bar, bári istep tur. Búgin ıis azaıyp tur. Shaǵym bolsa baqylaýdy jalǵastyra beremiz,- dedi Aqtóbe oblystyq ekologııa departamenti basshysynyń orynbasary Talap Usnadın.
Aıta keteıik, ekologter Atyraý munaı óńdeý zaýytyna kúkirtsýtek deńgeıiniń artýyna baılanysty tekseris júrgizedi. Buǵan 25 qańtarda Atyraýdaǵy birqatar eldi meken aýmaǵynda kúkirtsýtektiń shekti normadan asyp ketýi sebep bolyp otyr.