Aqtóbe ekologtary topyraq pen ózen sýynyń synamalaryn alyp, lastaýshy zattardy anyqtady

AQTÓBE. KAZINFORM – Aqtóbede ekologtar birneshe aýyl aýmaǵynda ózennen, topyraqtan synama aldy. Nátıjesinde lastaýshy zattar anyqtaldy.

Aqtóbe oblystyq Ekologııa departamentiniń zerthanalyq taldaýdy baqylaý bólimi Temir aýdanyna bardy. Onda Keńqııaq, Shubarshı, Sheńgelshi, Saǵa eldimekenderi aýmaǵyndaǵy Embi, Temir jáne Atjaqsy ózenderinen synama aldy.

- Ózenderdiń 7 aǵynynan synamalar alyndy. Keńqııaq, Shubarshı aýyldarynan topyraq synamalary alynyp, atmosferalyq aýa quramyndaǵy lastaýshy zattarǵa ólshem júrgizildi. Іrikteý synaǵy aı saıyn ótkiziledi. Jerústi sýlaryn zertteý barysynda sý men topyraqtan alynǵan úlgilerde ammonıı azoty, hlorıdter, sýlfattar, magnıı, kaltsıı jáne t.b. lastaýshy zattary anyqtalady. Al atmosferalyq aýany ólsheý kezinde kontsentratsııanyń artýy anyqtalmady. QR sý obektilerindegi sýdyń sapasyn baǵalaýdyń negizgi normatıvtik qujaty «Sý obektilerindegi sý sapasyn jikteýdiń biryńǵaı júıesi» bolyp tabylady. Embi jáne Temir ózenderi aýyz sý, sharýashylyq jáne balyq sharýashylyǵyna jaramsyz tórtinshi klasqa jatatyny belgili boldy, - dep habarlady Aqtóbe oblystyq ekologııa departamenti.

Eske salsaq, Aqtóbege ǵalymdar men tabıǵat janashyrlary jınalyp, munaı óndirilip jatqan «Kókjıde» ken ornyndaǵy taza sýdy qalaı saqtap qalýǵa bolatynyn talqylady. Qazir munda 5 kompanııa «qara altyn» óndirisimen aınalysady. Jyl saıyn sýdyń lastaný deregi tirkelip tur.