Aqtóbe ekologteri polıgon janyna qoqys tógý deregin tekseredi

AQTÓBE. KAZINFORM — Qoqys polıgony janyndaǵy alańda túzilgen turmystyq qatty qaldyq áli tolyq jınalmady. Ekologtar shaǵym túskenin, tekserý qabyldaý úshin eki apta ishinde sheshim qabyldanatynyn jetkizdi. 

Aqtóbe qalasyndaǵy qoqys polıgony senimgerlik basqarýdan alynyp, kommýnaldyq kásiporynǵa berildi. Qazir munda «Qyzmet Aqtóbe» mekemesiniń jumysshylary júr.

— Qoqys polıgony senimgerlik basqarýǵa berilgen joq. Senimgerlik basqarýǵa alatyn ınvestor tabylǵanǵa deıin jumysyn ýaqytsha «Qyzmet Aqtóbe» mekemesi júrgize turady. Bul sharýashylyq júrgizý quqyǵyna ıe kommýnaldyq memlekettik kásiporyn, — dedi Aqtóbe oblysy ákiminiń baspasóz hatshysy Aıgúl Baımenova.

Polıgon basshysy Arsen Jolamanovtyń aıtýynsha, tek qoqysty qabyldaý, ony jaıý jáne taptaý, árbir 10 metr saıyn betin qummen jaýyp, nyǵyzdaý mindetteldi. Qoqys tasymaldaý kompanııalary men jeke kásipkerlerden esh kedergisiz qabyldanyp jatyr.

— Polıgonda kezekshi órt sóndirý kóligi bar. Bul órt tirkelse jedel áreket etý úshin qajet. Qoqys saǵat 8:00–den 20:00–ge deıin qabyldanady. Táýlik boıy jumys isteıtin kommýnaldyq mekeme kólikteri kire beredi. Munda dıspetcher qujattaryn tekserip, salmaǵyn ólsheıdi. Qoqys tógetin jerde nusqaýshy jumys isteıdi. Shuńqyrǵa tókken soń ony tegisteımiz. Qazirgi kezde 40 kompanııamen arada kelisimshart jasaldy. Eger jeke adamdar ákelse tonnasyn 1720 teńgeden qabyldaımyz, — dedi Arsen Jolamanov.

Onyń aıtýynsha, buǵan deıin polıgondy senimgerlik basqarýǵa alǵan kompanııa men qoqys tasymaldaýshylar arasyndaǵy daýdan soń syrtqa tasymaldanǵan qoqys jınalyp, polıgonǵa qaıta tógelgen. Alaıda turmystyq qatty qaldyq polıgonynyń oń qaptalyndaǵy qoqys jınaý jumysy tolyq aıaqtalmaǵan. Munda aǵashtyń kesilgen butalaryn, qaladaǵy túrli qyzmet kórsetý jáne saýda oryndarynyń qaldyqtaryn kórýge bolady. Sonymen birge iri munaı kompanııasynyń, banktiń is-qujattary, túrli kelisimsharttar shashylyp jatyr. Aqtóbe oblysy ákimdiginen shyqqan 15 jyl burynǵy qujat kóshirmelerin de anyq kórýge bolady. Polıgon mańyndaǵy alańdaǵy qaldyq taıaýda shyǵarylǵan jáne órt bolǵan aýmaqta endi-endi kómý jumysy júrgizilip jatyr. Ekologtar tekserý týraly sheshimdi áli qabyldamady. 

— Ekologııa departamentine «Neo Plus» JShS-ne bólek, sonymen birge «Qarǵaly» jeke kásipkerligi, «ATK Qyzmet» JShS, «Neo Plus» JShS-ne qatysty bólek shaǵym tústi. Birinshi is boıynsha qazir tekserý júrip jatyr. Polıgon jabylǵan kezde «Neo Plus» JShS- i sol jaqta ornalasqan suryptaý kesheniniń ishine tókken qoqysty. Bul durys emes. Tekserý kezinde ony qaıtadan polıgonǵa tasymaldady. Al ekinshi shaǵym úsh kompanııaǵa qatar berildi. Tekserýge negiz bar ma, joq pa degen suraq qaralyp jatyr. Sheshim 15 jumys kúni ishinde qabyldanady. Qaldyqty kez kelgen jerge tógýge bolmaıdy. Belgilengen jerge jınaıdy, belgilengen jerge tógedi. Bul degenimiz — polıgon, — dedi Aqtóbe oblystyq ekologııa departamenti memlekettik ekologııalyq baqylaý bóliminiń basshysy Marat Karıbaev.

Aıta keteıik, Aqtóbede qoqys suryptalmaıdy, óńdelmeıdi. Polıgon janyndaǵy suryptaý kesheni birneshe jyl buryn ashylǵanymen, jumysy toqtap tur. «Neo Plus» JShS-niń ıeligindegi keshendi ózge kásipker alýy múmkin. 

— Qazirgi kezde ishindegi tehnıkany jóndep jatyrmyz. Biz qoqystyń bárin suryptaımyz. Endi qoqys aldymen osynda tógilip, irikteledi. Arnaıy qurylǵyda barlyǵy 20 adam turady. Kúni-túni jumys istep, qaladan shyǵyp jatqan qoqystyń 60-70 paıyzy suryptaǵymyz keledi. Bul jer azyp-tozyp ketken jáne paıdaǵa asatyn zat bolmady, — dedi jeke kásipker Syrym Aldabergenov.

Eske salsaq, bıyl Aqtóbeniń polıgonyn senimgerlik basqarýǵa alǵan «Taza Álem 12» JShS qoqys shyǵarýshylardy da, ákimdikti de sotqa bermek. Ol buǵan deıin tasymaldaýshylardyń kelisimshartqa otyrmaǵanyn, bir teńge de tólemegenin, birneshe aı ótse de ótinishke qulaq aspaǵanyn aıtyp otyr. 

Aqtóbe qalasy ákimdiginiń habarlaýynsha, úsh aı synaq merzimmen senimgerlik basqarýǵa alǵan kompanııa negizgi talaptardy oryndamaǵan. Onyń ishinde qorshaǵan ortaǵa teris áserdi boldyrmaý úshin qaldyqtyń betin topyraqpen jabý arqyly paıdalaný, qaldyqtardy aldyn ala suryptaý úshin úsh jyljymaly suryptaý keshenin, qurylys qaldyqtaryna arnalǵan usaqtaǵysh qurylǵy ornatý jumystary bar. Sonymen birge qalalyq senbilikterde nemese eki aılyq kezeńde jınalǵan qatty turmystyq qaldyqty tegin ornalastyrýdy jáne kómýdi qamtamasyz etý kelisimi jasalǵan.