Aqtóbe ekologtary qoqys polıgonyna jaýapty bolǵan merdigerdiń isin teksere almady
AQTÓBE. KAZINFORM — Polıgondy senimgerlik basqarýǵa alǵan merdiger ekologtar jibergen hatty almaı, jazadan qutylyp ketti. Al ákimdik qyzmetkeri ákimshilik jáne tártiptik jazaǵa tartyldy.
Aqtóbe qalasyndaǵy qoqys polıgonynyń janyna turmystyq qatty qaldyq tógý deregin tirkegen ekologtar tekserý jumysyn júrgizdi. Qoqys tasymaldaıtyn «NEO PLUS» JShS jáne sol kezde polıgondy senimgerlik basqarýǵa alǵan «Taza álem 12» kompanııasy nazarǵa ilikti. «NEO PLUS» JShS polıgon mańyndaǵy qorshalǵan aýmaqty qoqysqa toltyrǵany úshin ákimshilik jaýapqa tartyldy. Tekserýden soń kemshilik joıyldy. Al «Taza álem 12» kompanııasynyń basshysy ekologtarmen kezdesýden bas tartty.
— «Taza álem 12» kompanııasyna qatysty tekserýdi aıaqtaı almadyq. Sebebi kompanııa basshysy tekserýge qarsy bolyp, kedergi keltirdi. Tekserý týraly aktimen tanyspaı, qashqaqtady. Tek telefon arqyly sóılesip otyrdy. Kásipkerlik kodeksine sáıkes biz aldyn ala aktimen tanystyrýymyz kerek. Sondyqtan tekserý toqtatyldy. Kodeks talaby boıynsha 5 jumys kúni ǵana berildi. Qoqys polıgon janyna jınalǵan soń departament qala ákimdigine shara qabyldaý týraly hat joldady. Aqtóbe qalalyq turǵyn úı — kommýnaldyq sharýashylyq, jolaýshylar kóligi jáne avtomobıl joldary bólimi sol mańdy ishinara tazartty. Soǵan qaramastan bólim basshysy ákimshilik, tártiptik jazaǵa tartyldy. Bul jumys bıyl jalǵasady. Qar túsip ketkende qoqysty túgel jınap úlgermegen bolýy múmkin, — Aqtóbe oblystyq ekologııa departamenti basshysynyń orynbasary Talap Usnadın.
Ekologtarǵa habarlama túsken kezde «Taza álem 12» kompanııasynyń eski polıgondaǵy qoqysty qaıta qazyp alǵany týraly aıtylǵan. Alaıda bul derektiń ras, ótirigin tekserý múmkin bolmady.
— Kásipkerlik kodekstiń olqy tusy da bar. Hatty mekenjaıyna tapsyryspen jibersek te qabyldamady. Tekserýge kedergi keltirgeni úshin jaza qarastyrylmaǵan, — dedi Talap Usnadın.
Eske salsaq, kúzde qoqys polıgony janyndaǵy alańda turmystyq qatty qaldyq tógildi. Ekologtar sol kezde tekserý bastady. Al polıgondy senimgerlik basqarýǵa alǵan «Taza Álem 12» JShS qoqys shyǵarýshylardy da, ákimdikti de sotqa beretinin habarlady. Ol buǵan deıin tasymaldaýshylardyń kelisimshartqa otyrmaǵanyn, bir teńge de tólemegenin, birneshe aı ótse de ótinishke qulaq aspaǵanyn aıtty.