«Aqtóbe» Dostastyq kýbogyna qatysýda
ASTANA. Qańtardyń 18-i. QazAqparat /Ernur Aqanbaı/ - Máskeýde ótip jatqan Fýtboldan 2010 jylǵy TMD jáne Baltyq elderi chempıondary kýbogy jarysynda Qazaqstan atynan synǵa túsip jatqan Aqtóbeniń «Aqtóbe» klýby eki kezdesý ótkizip, onyń bireýinde jeńiske jetti, ekinshisinde jeńilip qaldy,
dep habarlaıdy QazAqparat.
Bizdiń komanda jarys kúntizbesine sáıkes, aldymen Fınlıandııanyń «HIK» komandasymen kezdesip, oǵan 0:1 esebimen ese jiberip qoıdy. Sodan keıin keshe Tájikstannyń «Vahsh» klýbynan 2:0 esebimen basym tústi. «Aqtóbe» kelesi oıynyn erteń Ázirbaıjannyń «Baky» komandasymen ótkizedi.
Aıta keteıik, jerebe boıynsha bizdiń komanda Ázirbaıjannyń «Baky», Fınlıandııanyń «HIK» jáne Tájikstannyń «Vahsh» klýbtarymen birge «V» tobynda oınaýda. Atap óterligi, «Aqtóbe» 2009 jylǵy TMD jáne Baltyq elderi chempıondary kýbogy týrnıriniń kúmis júldegeri atanǵan bolatyn. Fınalda jerlesterimiz Moldovanyń «Sherıf» klýbyna ese jiberdi. «Aqtóbe» men «Sherıf» arasyndaǵy fınaldyq matchtyń negizgi jáne qosymsha ýaqyty 1:1 esebimen teń aıaqtalǵandyqtan, jeńimpaz penaltı arqyly anyqtalǵan bolatyn. Onda salqynqandylyq tanytqan moldovandar 5:4 esebimen jeńiske jetti. Sóıtip «Aqtóbe» óz tarıhynda tuńǵysh ret Dostastyq kýbogynyń kúmis júldesine ıe boldy. Bul buǵan deıin atalmysh týrnırge qatysqan qazaqstandyq klýbtardyń ishindegi eń joǵary nátıje.
Al 2010 jylǵy Dostastyq kýbogy úshin jarysta «A» tobynda Belarýstyń «Dnepr», Qyrǵyzstannyń «Dordoı-Dınamo», Latvııanyń «Metallýrg», Reseıdiń «Rýbın»; «S» tobynda Ýkraınanyń «Dınamo» Kıev», Túrikmenstannyń «MTTÝ», Estonııanyń «Levadııa», Reseıdiń Klýbtar quramasy; «D» tobynda Ózbekstannyń «Býnedkor», Lıtvanyń «Ekranas», Molodovanyń «Dachııa», Armenııanyń «Pıýnık» komandalary óner kórsetetin bolady. Aıta keteıik, qańtardyń 16-da bastalǵan «Dostastyq» kýbogy úshin jarys qańtardyń 24-i kúni aıaqtalady.
