«Aqtóbe» chempıondyqqa talasty jalǵastyrady

ASTANA. KAZINFORM – Búgin fýtboldan Qazaqstan Premer-lıgasynyń HHІІ týrynda «Aqtóbe» óz alańynda almatylyq «Qaıratty» jeńdi. 

Bul kezdesý atalǵan týrdaǵy basty oıynnyń biri boldy. Qos komanda da bıyl chempıondyqtan úmitker sanalady. Úzdik úshtikte bir-birimen úzeńgiles keledi.

Kezdesý barysynda almatylyq klýb sapynan Vıtalıı Gromyko 52-mınýtta mergendik tanytqan edi. Degenmen olar bul esepti ustap tura alǵan joq. «Aqtóbe» sapynan Freddı Gondola 82-mınýtta tarazy basyn teńestirse, Idrıs Ýmaev 89-mınýtta jeńis golyn soǵyp ketti. Osylaısha qarsylasyn 2:1 esebimen qapy qaldyrǵan «Aqtóbe» týrnır kestesinde ekinshi orynǵa kóterildi.

Dál osyndaı eseppen elordalyq «Jeńis» Qostanaıdyń «Tobylyn» tize búktirse, «Atyraý» óz alańynda Túrkistannyń «Turanynan» 3:0 esebimen basym tústi. Al, atalǵan týrdaǵy «Astana» men «Shahter» (Qaraǵandy) kezdesýi 16 qazanǵa shegerildi.

Eske salsaq, budan buryn «Jetisý» «Elimaıdy» 2:0 esebimen jeńse, «Ordabasy» komandasy «Qyzyljardy» 1:0 esebimen súrindirdi.