«Aqtóbe» bıyl da ızraıldik komandadan utylyp qaldy
ALMATY. Tamyzdyń 4-i. QazAqparat /Erbol Turymbetov/ - Keshe fýtboldan Eýropa kýboginiń irikteý syndarynda óner kórsetip jatqan el chempıony «Aqtóbe» komandasy Izraıldik «Hapoel Tel-Avıv» komandasymen jaýapty kezdesýin ótkizip, 3:1 esebimen utylyp qaldy,
dep habarlaıdy QazAqparat.
Óz alańynda ótken alǵashqy matchta «Aqtóbelikter» qarsylastar qaqpasyna jaýapsyz 1 gol soǵyp, kezdesýdi jeńispen aıaqtaǵan bolatyn. 11 metrlik aıyp dobyn Enıama qaqpasyna toǵytqan qorǵaýshy-kapıtan Samat Smaqov bolǵan-dy. Endi qarymta oıynda teń nátıje nemese 2:1 esebimen utylý aqtóbelikterge kelesi aınalymǵa ótýge mýmkindik beretin edi.
Jalpy oıyn barysy Tel-Avıvtik komandanyń basymdyǵymen ótti. Oıyn bastalysymen Sıdelnıkov qaqpasyna lap qoıǵan qarsylastar 18-shi mınýtta esep ashty. Goldyń avtory jartylaı qorǵaýshy Eran Zehavı. Al 31-shi mınýtta komanda quramyndaǵy eń belsendi oıynshy Ben Saar esepti eseledi. Qarymta shabýyl uıymdastyrmaq bolǵan «Aqtóbe» oıynshylary maqsattaryna jete almady. Kóp ýaqyt ótpeı, 35-shi mınýtta bizdiń komandanyń qaqpasyna legıoner-qorǵaýshy Banyń qateliginen úshinshi dop soǵyldy. Osy eseppen oıynnyń birinshi bóligi aıaqtaldy. Ekinshi taımda da bir qalyppen órbigen oıyn órnegi esh nátıje bermedi. Tek 88-shi mınýtta ǵana sapynan ótkir shabýylshy Murat Tileshev «Aqtóbeniń» bul kezdesýdegi jalǵyz golynyń ıesi atandy.
Esterińizde bolsa, el chempıony byltyr da ekinshi aınalymda ızraıldik «Makkabı-Haıfa» komandasyna jol bergen bolatyn. Osymen qazaq eliniń komandalary bıylǵy Eýropa birinshiligindegi oıyndaryn aıaqtady.
