Aqtóbe bilikti sport jattyqtyrýshylaryna bar jaǵdaıdy jasaýǵa ázir
AQTÓBE. QazAqparat - Aqtóbede sportty damytýǵa jylyna 6 mıllıard teńge bólinedi. Biraq sportshylardyń jetistikteri az. Bul týraly Aqtóbe oblysynyń ákimi Berdibek Saparbaev sport salasy basshylarynyń esep berýinde aıtty, dep habarlaıdy QazAqparat tilshisi.
Aqtóbede sport salasyn damytýǵa bólingen qarjy kólemi jyl saıyn artyp keledi. Bıyl sport keshenderiniń materıaldyq-tehnıkalyq bazasyn nyǵaıtýǵa 6 mıllıard teńge jumsaldy. Óńir basshysy Berdibek Saparbaevtyń tóraǵalyǵymen ótken jıynda buqaralyq jáne kásibı sportty,aımaqtyq sport federatsııalaryn damytýdyń jaı-kúıi men keleshegi talqylandy.
«Bólinetin qarjy kólemin azaıtpaı, materıaldyq-tehnıkalyq bazany nyǵaıtý úshin barynsha kúsh salyp jatyrmyz. Jańa nysandar salynýda. Dene shynyqtyrý men sportty qarjylandyrý jaǵynan biz respýblıka boıynsha aldyńǵy bestikke kiremiz, al sportshylardyń nátıjesi boıynsha sońǵy oryn qaldyq. Kóptegen sport túrleri boıynsha óz pozıtsııalarymyzdan aıyryldyq», - dedi oblys ákimi B.Saparbaev.
Ekonomıka jáne bıýdjetti josparlaý basqarmasynyń basshysy Oljas Smaǵulovtyń aıtýynsha, sońǵy 4 jylda qarjylandyrý 7 esege ulǵaıǵanymen balalar jáne jasóspirimder sport mektepteriniń tıimdiligi az. Óńirde jumys istep turǵan balalar jáne jasóspirimderdiń 28 sport mektebinde tehnıkalyq-materıaldyq baza joǵary. Mundaı jaǵdaı Almaty oblysynda ǵana jasalǵan.
Saralaı kele sportshylardyń tómen nátıje kórsetýi kásibı jattyqtyrýshylar quramynyń jetispeýshiliginen týyndap otyr. Búginde 28 tárbıelenýshini 1 jattyqtyrýshy sportqa baýlıdy. Alaıda balalar jáne jas óspirimder sport mektepteriniń teń jartysynda ǵana joǵarǵy sanatty jattyqtyrýshylar bar. Al keıbirinde qarapaıym adamdar jumys isteıdi. Olardyń eshqandaı sanaty joq.
Berdibek Saparbaev olqylyqtarǵa oblystyq dene shynyqtyrý jáne sport basqarmasynyń basshylyǵy jaýapty ekenin eskertti. «Ótken jyly basqa óńirlerde turatyn talantty aqtóbelik sportshylar men jattyqtyrýshylardy qaıtarý týraly tapsyrma berildi. Nátıje qaıda? Eger olarǵa materıaldyq kómek nemese turǵyn úımen qamtamasyz etý qajet bolsa, kelip aıtý kerek edi. Eki jyl boıy basqarma men sport mektepterinen eshkim bul máseleni kótergen emes. Eger jaqsy jattyqtyrýshy bolsa, biz barlyq qajetti qoldaýdy qamtamasyz etemiz. Bizde talantty balalar bar, tek olarǵa jaqsy tálimgerler qajet», - dedi B.Saparbaev.
Jıyn kezinde oblys sportshylarynyń QR ulttyq jáne shtattyq quramalarynyń tizimine enýi, jazǵy, qysqy jáne ulttyq sport túrlerin damytý, múmkindigi shekteýli jandardy sportpen jáne dene shynyqtyrýmen qamtý máseleleri qaraldy.
Aqtóbe oblysy ákiminiń baspasóz qyzmetiniń habarlaýynsha, bolashaǵynan molúmit kúttiretin balalar jáne jasópirimder sport mektepteriniń tárbıelenýshilerine arnalǵan jazǵy sport lagerin ashý týraly pikir qoldaý tapty. Óńir basshysy Berdibek Saparbaev sport ardagerleri, bedeldi jattyqtyrýshylar, sportshylar, qoǵam qaıratkerleri men depýtattardan turatyn jumys tobyn qurýdy tapsyrdy. Olar bir aı ishinde sport jáne dene shynyqtyrýdy damytý máselelerine taldaý jasap, óz usynystaryn engizýleri qajet.
