Aqtóbe bazaryndaǵy órt: Saýdagerler shyǵyndaryn eseptep jatyr

Aqtóbedegi Ortalyq bazar búgin óz jumysyn toqtatty. Bazarǵa kiretin bes esiktiń bári jabylyp, satýshylar syrtta júr. Al oqıǵa ornynda órt sóndirýshiler jumys istep jatyr. Olar órtten soń byqsyp jatqan shoqty sóndirý jumystaryn jalǵastyrdy.

"Bazar ákimshiligi saqtandyrý júrgizilgenin, sol arqyly shyǵyn tolyq óteletinin aıtty. Biz aldymen saýda ornymyzǵa kirip, zattardyń iske asatynyn, janyp ketkenin bólek esepteýimiz kerek. Ózim telefonǵa qajetti aksessýarlar satamyn. Dabys ulǵaıtqyshtarym da bar. Bar shyǵynym 3 mıllıon teńgeden asady. Úıim nesıege alynǵan, kúıeýim ekeýmiz osy bazardamyz. Saýda aınalymyn arttyrý úshin jaqynda ǵana 500 myń teńge nesıe aldym", - dedi bazarǵa órt bolǵan ýaqytta kelgen jeke kásipker Aıgerim Mahambetova.

Al jeke kásipker Aısulý Esenamanova Aısultan pavılonyndaǵy jertólede 50 mıllıon teńgeniń taýary qalǵanyn aıtyp berdi.

"Keshe ǵana taýar ákeldim, ózim temeki satamyn. Qazir bazarǵa kire almaı, ornymyzdyń ne bolǵanyn kóre almaı turmyz. Tek bazar ákimshiligi kirgen soń zattardyń shyǵynyn esepteýge, ótep berýge ýáde etti. Qur sóz kúıinde qala ma dep qorqamyz", - dedi A.Esenamanova.

Taǵy bir satýshy Nursultan Abdollaev bazar ishindegi jaǵdaıdan beıhabar júrgenderine ashýly.

"Mende 10 mıllıon teńgeniń taýary bar. Bári sóz júzinde aıtyldy. Sýǵa ketti me álde órtendi me degen suraq mazalap júr. Tań atpaı keldik, túske jaqyn áli habarsyz júrmiz. Ózim elektr buıymdaryn satamyn", - dedi ol.

Oqıǵa ornynda polıtsııa qyzmetkerleri kúzetti kúsheıtken. Bazar mańyndaǵy joldar da jabyldy. Órt sóndirýshilerdiń jumysy jalǵasyp jatyr.

"Ótken jyly Ortalyq bazardaǵy órt qaýipsizdigi tekserildi. Bazar ishine kiretin 5 esik bolsa, bárine órt sóndirý kólik kirdi. Keıde ýaqytsha saýda pavılondary salynyp, sol kedergi bolady. Barlyǵy 10 AEK kóleminde aıyppul salyndy. Bazar jumysyn toqtatýǵa sotqa aryz túsirdik. Bir aıda bazar ákimshiligi kemshilikterdi joıyp, bárin qalpyna keltirdi. Máselen, órtengen Aısultan pavılonynda 3 kemshilik boldy. Terezesi temirmen qorshalǵan, shyǵý joldary janǵysh zarttarmen bógelgen, shamdardyń syrtyndy qorǵan bolmady," - dedi Aqtóbe qalalyq tótenshe jaǵdaılar basqarmasynyń bastyǵy Aıbat Jańabergenov.

Aıta keteıik, bazarǵa oblys ákiminiń orynbasary Mavr Abdýllın baryp, satýshylarmen kezdesti. Qazir jeke kásipkerler saýda oryndaryna kirip, shyǵyndy esepteý úshin bazar mańynda júr.

Buǵan deıin habarlaǵanmyzdaı, búgin tańda Aqtóbeniń ortalyq bazary órtendi. Órtti sóndirýge 170 adam jumyldyryldy.