«Aqtóbe» áıelder komandasy Chempıondar lıgasynda jeńiske jetti
ASTANA. KAZINFORM — Fýtboldan «Aqtóbe» áıelder komandasy búgin UEFA Chempıondar lıgasynyń 2026/27 jylǵy maýsymyndaǵy irikteý kezeńindegi alǵashqy matchyn ótkizdi.
Jerebe boıynsha úshinshi topqa túsken aqtóbelik ujym Islandııanyń «Breıdablık», Shveıtsarııanyń «Servett» jáne Belarýstiń «Dınamo-Mınsk» komandalarymen birge kelesi kezeńniń joldamasyn sarapqa salyp jatyr.
Mını-týrnırdiń qojaıyny ári uıymdastyrýshysy bolyp Aqtóbe qalasy bekitildi. Toptaǵy barlyq match Qobylandy batyr atyndaǵy Ortalyq stadıonda ótip jatyr.
Joldama úshin tartys 5 tamyzda jartylaı fınaldyq kezdesýden bastaldy. Onyń birinde «Aqtóbe» ıslandııalyq «Breıdablıkpen» kúsh synassa, taǵy bir jupta «Dınamo-Mınsk» pen «Servett» ózara myqtyny anyqtady.
Jartylaı fınaldaǵy «Aqtóbe» — «Breıdablık» kezdesýiniń negizgi kezeńi 1:1 esebimen teń aıaqtaldy. Qazaqstandyq komanda sapynan Ekaterıny Babshýk 12-mınýtta esep ashsa, arada tórt mınýt ótkende ıslandııalyq komandadan Keıtlın Dýong tarazy basyn teńestirdi.
Negizgi kezeń teń aıaqtalǵannan keıin oıyn overtaımǵa ulasty. Overtaımda jeńimpaz anyqtalǵan joq. Penaltı serııasynda aqtóbelik komanda basym tústi.
Taǵy bir jartylaı fınalda «Servett» «Dınamo-Mınsk» komandasyn 3:0 esebimen jeńdi.
Endi 8 tamyzda «Aqtóbe» men «Servett» synǵa tússe, 3-oryn úshin «Breıdablık» pen «Dınamo-Mınsk» oınaıdy.
Mını-týrnır qorytyndysy boıynsha 2-oryn alǵan komanda eýrokýbok maýsymyn áıelder arasyndaǵy Eýropa kýbogynyń ekinshi irikteý kezeńinde jalǵastyrady. Al 3-orynǵa taban tiregen ujym osy týrnırdiń birinshi irikteý kezeńine attanady. Bas júlde — áıelder arasyndaǵy UEFA Chempıondar lıgasynyń úshinshi irikteý kezeńine beriletin joldamany tek top jeńimpazy ǵana ıelenedi.
Chempıondar lıgasynyń atalmysh kezeńinde barlyǵy 19 komanda baq synaıdy. Aıta ketý kerek, birinshi irikteý kezeńiniń negizgi matchtary 22 jáne 25 shildege josparlanǵan. Alaıda mını-týrnırlerdiń kestesine baılanysty «Aqtóbe» qatysatyn toptyń oıyndary tamyzdyń birinshi aptasyna aýystyryldy. Іrikteýdiń ekinshi kezeńinde bes úzdik komandaǵa taǵy 39 eýropalyq klýb qosylady.
Eske salsaq, budan buryn Shveıtsarııanyń Non qalasynda UEFA Chempıondar lıgasy pleı-off kezeńiniń jerebesi tartylyp, qazaqstandyq «Qaırat» (Almaty) komandasynyń yqtımal qarsylasy anyqtaldy.
