«Aqtóbe» áıelder arasyndaǵy el birinshiliginde gol soǵýdan rekordty jańartty
ASTANA. KAZINFORM — Fýtboldan áıelder arasyndaǵy Qazaqstan chempıonatynyń altynshy týrynda «Aqtóbe» komandasy qarsylas qaqpasyna gol soǵý jóninen rekordty jańartty.
Aqtóbelik fýtbolshylar bıylǵy birinshilikti sátti ótkizip keledi. Bes týrda tórt márte jeńiske jetip, nebári bir kezdesýde teń nátıjege qanaǵat bildirdi. Qarsylastar qaqpasyna 36 gol soǵyp, óz qaqpasyna nebári 2 gol jiberip aldy.
Bul joly da sáttilik serııasyn jalǵastyrdy. Olar óz alańyndaǵy «Atyraýdy» 19:0 esebimen jeńip, buǵan deıin tirkelgen rekordty jańartty.
Nátıjesinde aqtóbelik komanda nebári alty týrda qarsylastar qaqpasyna 55 gol soǵyp úlgerdi.
Aıta ketsek, budan buryn ekinshi týrda túrkistandyq «Turan-Tomırıs» kókshetaýlyq «Oqjetpesti» 18:0 esebimen tize búktirgen edi.
Altynshy týrdaǵy qalǵan oıyn nátıjesi tómendegishe:
«Qaırat» (Almaty) — «Qaısar» (Qyzylorda) 4:1
«Ulytaý» (Jezqazǵan) — «Elimaı» (Semeı) 1:2
«Astana» — «Tobyl» (Qostanaı) 0:0
«Qyzyljar» (Petropavl) — «Jetisý» (Taldyqorǵan) 1:0 .
Dál qazir BIIK (Shymkent) — «Oqjetpes» (Kókshetaý), «Tomırıs-Turan» (Túrkistan) — «Jeńis» (Astana) kezdesýýi ótip jatyr.
Bıyl Qazaqstan fýtbol federatsııasy talabymen erler klýbtarynyń janynan áıelder quramalary qurylǵan. Ótken jyly chempıonatqa tek 4 óńirden 5 komanda ǵana tirkelgen edi.
Ár komanda sapynda keminde qazaqstandyq fýtbol mektebiniń 13 túlegi bolýǵa tıis degen talap qoıylyp otyr. Oǵan 2009 jyly jáne odan erte dúnıege kelgen fýtbolshylar qatysa alady.
