Aqtóbe avtoparki 100 jańa avtobýspen tolyǵady

AQTÓBE. QazAqparat – Aqtóbe avtoparki maýsym aıynyń sońyna deıin 100 jańa avtobýspen tolyǵady, dep habarlaıdy QazAqparat.

Aqtóbe oblysy ákimdigi baspasóz qyzmetiniń málimeti boıynsha, oblys ortalyǵyna «Yutong» markaly 75 avtobýs ákelingen. Taǵy 25-i 20 maýsymǵa deıin ákelinedi dep josparlanǵan.

Oblys ákimi Eraly Toǵjanov jańa avtobýstardy qarap shyqty.

«Qala Trans» ókilderi qala mańyndaǵy turǵyn úı alaptary jáne shahar turǵyndary tarapynan ótinish kóp túsýine baılanysty 19 maýsymnan bastap № 7, 28, 5 marshrýttarǵa qyzmet kórsetý úshin jańa avtobýstar jelige shyǵatynyn habarlady.

«Yutong» markaly avtobýstardyń salony 12 kondıtsıonermen jabdyqtalǵan. Arnaıy sensor júrgizýshiniń sharshaǵanyn nemese jumystan alshaqtap ketkenin avtomatty túrde anyqtaıdy. Sondaı-aq, aldyńǵy áınekke qoıylǵan sensor jolaqty baqylap, joldaǵy kedergilerdi kórsetedi. Oqys oqıǵa kezinde aldynda kele jatqan kóliktiń tejegishi shuǵyl basylsa, avtobýs ózdiginen toqtaıdy.

Eraly Toǵjanov Aqtóbe qalasynyń TKSh bóliminiń basshylyǵyna Jańaqonys, Shılisaı, Aqjar-2 turǵyn úı alaptaryn qoǵamdyq kólikpen qamtamasyz etý máselesin sheshýdi tapsyrdy.

№5 baǵyttaǵy qoǵamdyq kólik Jibek joly turǵyn úı alaby turǵyndaryna qyzmet kórsetedi.

Osy 100 jańa avtobýstan bólek, osy jyldyń sońyna deıin syıymdylyǵy úlken 50 avtobýs satyp alynbaq.