Aqtóbe aýrýhanasyna kúıik shalǵan balalarǵa arnalǵan kereýet syıǵa berildi
Bolat Ótemuratovtyń qory búgin Aqtóbe balalar aýrýhanasyna úlken syı jasady. Quny 21,8 mıllıon teńge bolatyn kereýet balanyń arqasy, aıaǵy men jambasyn emdeýge yńǵaıly. Sonymen qatar, bas-mı jaraqaty, býyn, júrek otasynan shyqqan naýqasqa kútim jasaýǵa múmkindik beredi.
«Kereýet ishi aýamen toltyrylady. Bul arqasy, jambasy, basy aýyratyn naýqastar úshin qajet»,- dedi Aqtóbe oblystyq balalar aýrýhanasynyń bas dárigeri Nurjan Kojın.
Kereýet jaz aıynda ótkizilgen qaıyrymdylyq aýktsıony kezinde túsken qarjyǵa satyp alyndy. Sonymen qatar, Petropavl, Taldyqorǵan, Oral qalalaryndaǵy emdeý oryndaryna medıtsınalyq qural-jabdyqtar men tehnıka syıǵa berildi.
«Bul qaıyrymdylyq aktsııasyna qatysqan adamdardyń qarjysyna satyp alynǵan kereýet. Jańa jabdyq balalardyń ómirin saqtaýǵa múmkindik beredi», - dedi qordyń dırektory Marat Aımaǵambetov.
Aıta keteıik, jyl basynan beri oblystyq balalar aýrýhanasyna kúıik shalǵan 83 bala tústi. Onyń 20-sy aýyr jaǵdaıda boldy. Al gaz ballon jarylǵan kezde úıinde bolǵan 17 jastaǵy jasóspirim qaza tapty. Dárigerler jańa kereýet jaǵdaıy asa aýyr balalardy aman alyp qalýǵa kómektesedi dep otyr. 