Aqtóbe aýrýhanasyndaǵy jaraqatqa járdem berý bólimi qalaı jumys istep jatyr?
Aqtóbe qalasynda ornalasqan kópsalaly aýrýhanadaǵy jaraqatqa járdem berý bóliminde kómek suraǵan naýqas kóbeıdi. Kezekshilikke shyqqan travmatolog pen dárigerler táýlik boıy damyl tappaı jumys istep jatyr. Kazinform tilshisi aýrýhanaǵa baryp, qabyldaý bólimindegi jaǵdaıdy bildi.
Aqtóbe oblystyq kópsalaly aýrýhananyń jaraqatqa járdem berý bóliminde kezekshilik jergilikti ýaqytpen saǵat 8:30-da almasady. Munda bir táýlikte bir travmatolog dáriger, eki medbıke jáne eki sanıtar jumys isteıdi. Bólimge kire beriste jedel járdem kólikteri naýqastardy kezekpen jetkizip jatty. Olardyń ishinde Aqtóbe-Hromtaý tasjolynda jol-kólik apatyna ushyraǵan adamdar men qulap jaraqat alǵandar, tóbeles kezinde mertikkender men turmystyq zorlyq- zombylyqqa tap bolǵandar da bar. Dárigerler aldymen jol-kólik apatynda zardap shekken adamdardy qabyldady. Aty-jónin jazyp alyp, oqıǵanyń mán-jaıyn surady. Keıin birden kompıýterlik tomografııa, rentgenge jiberip jatty. Bul qyzmet te táýlik boıy esh demalyssyz jumys isteıdi.
- Sońǵy bir apta ishinde oblystyq kópsalaly aýrýhanasynyń travmpýnkitine 650-den astam adam keldi. Sonyń 347-i muzǵa taıyp qulaǵan. 30 adam jol-kólik apaty kezinde zardap shekti. Kóp jaǵdaıda naýqastar ambýlatorly emge jiberildi. Sonyń ishinde 650-den astam adamnyń 65-i aýrýhanaǵa jatqyzyldy. Sońǵy bir kúnniń ishinde 114 adamdy qabyldanyp, sonyń 18-i aýrýhanaǵa qaldyryldy. Qazirgi kezde qala boıynsha kópsalaly aýrýhanada ǵana shuǵyl qyzmet kórsetetin jalǵyz travmatologııa bar. Sondyqtan bári osy jerge jetkiziledi, - dedi travmatolog dáriger Ǵabıt Ǵubaı.
Onyń aıtýynsha, ózi bıyl ǵana osy aýrýhanaǵa jumysqa ornalasyp, naýqastarǵa em-dom jasap júr. Alǵash ret Jańa jylda kezekshilikke tústi.
- Qazir ujymdyq basqosýlar kóbeıip, jaraqat alǵan adamdar da artyp ketti. Mas kezde qulap, jaraqat alady. Tóbeles te bar. Mas kúıinde otbasynda bolatyn urys-keris sońy da osynda ákelip jatady. Negizi saǵat 10:00-den bastap, erteńine tańǵy 5:00-ge deıin adam úzilmeıdi. Al ujymdyq merekelik kesh beısenbiden bastalyp, demalysta kóbeıedi. Bir kúnde 115 adam kelse, saǵat 12:00-den keıin qaralǵandardyń 25-i mas kúıinde taıyp qulaǵan, tóbelesten jaraqat alǵandar, - dedi travmatolog.
Olardyń arasynda mas kúıinde tóbeles shyǵaratyndar da kezdesedi. Al Aýrýhanada kúzeti qarastyrylmaǵan. Medıtsına qyzmetkerleri qaýip tónse polıtsııadan kómek suraıdy. Taǵy bir qıyndyq týǵyzatyny - úı-kúısiz júrgen adamdar. Olar tún ortasynda túsedi.
- Kómek kórsetemiz. Aýrýhanaǵa jatqyzatyndaı derti bolmasa úıine jiberý kerekpiz. Al biz olardy qaıda jibererimizdi bilmeımiz, - dedi Ǵabıt Ǵubaı.
Kópsalaly aýrýhananyń qabylaý bólimine sát saıyn jedel járdem kóligi kelip jatty. Feldsherler de meıram kúni qarbalasqa toly ekenin aıtty.
- Mereke kúnderi ishimdik iship, ýlanyp qalatyn adamdar kóbeıdi. Qazir bir naýqasty jetkizdik. Іshimdik iship, qulaǵan. Uryp ta ketken. Mundaı shaqyrtý 25-jeltoqsannan keıin kóbeıdi. Kúndiz de, túnde de osyndaı shaqyrtý bolyp jatyr, - dedi feldsher Nurhat ıÝsýpov.
Naýqastardyń bárin aldymen medbıkeler tirkeıdi. Olar da kezekshilikpen jumys isteıdi. Bir táýlik tik turyp qyzmet kórsetetin dáriger kómekshileri eki kún demalys alady. Eger adam kóbeıip, jaǵdaı qıyndasa, qaıta jumysqa shyǵady.
- Medbıke qyzmetinde júrgenime 40 jyl boldy. Qazir qalada jer taıǵaq, sondyqtan adam da kóp kelip jatyr. Ár merekede emes, kezekshiligim qalaı túsedi, solaı jumysqa shyǵamyn. Meniń mindetim - kelgen adamdardy qarap, jýrnalǵa tirkep, KT, rentgenge aparý. Jaraqatyn tańyp berý, gıps salý. It qapqan adamdar da keledi. Eshkim de aýyrmasyn dep tileımin, - dedi medbıke Sáýle Ábdireshova.
Onyń sózinshe, túski as ishýge ýaqyt tappaǵan kúni tańǵy saǵat 2:00-de aýqattanatyn kezderi de kezigedi. Onda da kezektesip shyǵyp, jumysty toqtatpaıdy.
