«Aqtóbe» áýejaıynda koronavırýsqa qarsy oqý-jattyǵý ótti
AQTÓBE. QazAqparat – «Aqtóbe» áýejaıynda búgin oqý-jattyǵý ótti. Arnaıy stsenarıı boıynsha vırýs juqtyrǵan jolaýshy Nur – Sultan qalasynan keldi, dep habarlaıdy QazAqparat tilshisi.
Arnaıy daıyndalǵan stsenarıı boıynsha Nur – Sultan qalasynan kelgen áýe reısinde naýqas densaýlyǵyna shaǵymdandy. Onyń qyzýy joǵary, jóteledi. Tumaýǵa uqsas belgiler anyqtalǵan soń jolaýshy oqshaýlaý bólimine jiberilip, mamandar shaqyryldy. Dáriger tekserýinen soń naýqas juqpaly aýrýlar aýrýhanasyna jetkiziledi.
«Aýrýdyń kózi teńizde ómir súretin jándikten taraǵan dep aıtyp jatyr. Ekinshi nusqada ushatyn tyshqannan shyqqan. Bul vırýs tabıǵatta bar. Biraq jándikten adamǵa juǵyp, mýtatsııa bolyp, adamnan adamǵa taraǵan. Búkil álemde, Qazaqstanda, onyń ishinde Aqtóbe oblysynda epıdemııaǵa qarsy is-sharalar júrgizilip jatyr. Kez kelgen jaǵdaıǵa daıynbyz. Bastysy – adam tez arada oqshaýlanady», - dedi oblystyq taýarlar, qyzmetterdiń sapasy men qaýipsizdigin baqylaý departamenti basshsynyń orynbasary Muhtar Serbaev.
