Aqtóbe áýejaıyn jekeshelendirý – Ǵımarat qunynyń durystyǵyna saraptama júrgiziledi

NUR-SULTAN. QazAqparat – QR Premer-Mınıstriniń birinshi orynbasary Álıhan Smaıylov Aqtóbedegi «Álııa Moldaǵulova halyqaralyq áýejaıy» AQ baǵalaý qunyn tekserýge qatysty depýtattyq saýalǵa jaýap berdi, dep habarlaıdy QazAqparat.

«QR «Qazaqstan Respýblıkasyndaǵy baǵalaý qyzmeti týraly» Zańynyń 11-babynyń 1-tarmaǵyna sáıkes, baǵalaý týraly esepte belgilengen baǵalaý obektisiniń naryqtyq nemese ózge qunynyń anyqtyǵy týraly daý bolǵan jaǵdaıda, onyń ishinde osy obektini baǵalaý týraly qolda bar ózge de esepke baılanysty baǵalaý týraly esepke saraptama júrgizilýi múmkin. Baǵalaý týraly esep saraptamasyn ony júrgizgen maman múshesi bolyp tabylatyn baǵalaýshylar palatasynyń sarapshylyq keńesi júrgizedi», - dep jazdy Álıhan Smaıylov óz jaýabynda.

Onyń aıtýynsha, baǵalaý týraly esep saraptamasy tapsyrys berýshiniń jáne (nemese) baǵalaý týraly esepti daýlaıtyn úshinshi tulǵanyń bastamasy boıynsha júrgiziledi.

«Osyǵan baılanysty baǵalaýshy usynǵan esepke saraptama júrgizý týraly tıisti hat «Qazaqstannyń baǵalaýshylar dostastyǵy» ózin-ózi retteıtin uıymy» palatasyna jiberildi. Baǵalaý týraly esepke saraptama júrgizý merzimi QR Qarjy mınıstriniń 2018 jylǵy 3 mamyrdaǵy № 503 buıryǵymen bekitilgen Baǵalaý týraly esepke saraptama júrgizý qaǵıdalarynda aıqyndalǵan jáne kúntizbelik 30 kúnnen aspaıdy», - dep atap ótti Premer-Mınıstrdiń orynbasary.

«Baǵalaý týraly zańnyń 11-babynyń 2-tarmaǵyna sáıkes, baǵalaý týraly esep saraptamasynyń nátıjesi baǵalaýshylar palatasynyń sarapshylyq keńesi daıyndaǵan oń nemese teris saraptamalyq qorytyndy bolyp sanalady. Baǵalaýshynyń esebi boıynsha teris saraptamalyq qorytyndy berilgen jaǵdaıda tapsyrys berýshi zańnamada belgilengen tártippen tıisti jumys júrgizedi», - dedi Á. Smaıylov.