Aqtóbe áýejaıyn komıssııa qaıta tekserip jatyr
AQTÓBE. QazAqparat – Aqtóbe áýejaıyn komıssııa qaıta tekserip jatyr. Oblys ákimi Ońdasyn Orazalın oblystyq qoǵamdyq komıssııa músheleri, BAQ ókilderimen kezdesýinde erteńnen bastap áýejaıda jumys qaıta jandanýy múmkin ekenin aıtty, dep habarlaıdy QazAqparat tilshisi.
Aqtóbe áýejaıy 17 naýryz kúni jabyldy. Sodan beri jóndeý jumystary júrgizilip jatyr. Al búgin oblys ákimi Ońdasyn Orazalın erteń-aq qaıta iske qosylýy múmkin ekenin aıtty.
«Bir aptanyń ishinde kemshilikti joıýǵa ýáde berdim. Keshe jumys tolyq aıaqtaldy. Inspektsııa kelip, búgin jumys júrgizip jatyr. Eger qorytyndysy oń bolsa, aeroport iske qosylady. Qazir biz onyń jaýabyn kútip otyrmyz. Jaı buqara zardap shekpeýi kerek. Sonaý Oral, Atyraý arqyly kelý shyǵyn, ońaı emes. Sondyqtan kemshilikti neǵurlym tez joıyp, iske qosýymyz kerek», - dedi oblys ákimi Ońdasyn Orazalın. Onyń aıtýynsha, áýejaı 2019 jyly jergilikti ákimdikke berildi. 2016, 2017, 2018 jyldary áýejaıda tabystan góri shyǵyny kóp bolsa, 2019 jyldan bastap kiris tústi. Statıstıkaǵa súıensek, 2016 jyly nebary 12 plıta aýystyryldy. 2017 jyly múlde jańarmady. Al 2018 jyly 48, 2019 jyly 72 beton tósem aýysty.
«Júk tasymaly kóbeıgen soń byltyr biz taldaý júrgizdik. Nátıjesinde osy jyldyń qyrkúıek aıyna deıin jóndeýge ruqsat berildi. Úlgeremiz dep júrgen ýaqytta bıyl aıaq astynan tekserý júrgizdi. Aeroport jabylyp qaldy. Qyrkúıek aıyn kútpeı erterek kelgeni bárimizge de aýyr tústi. Ózim tikeleı baqylaýymda ustap otyrmyn. Bul jumys birinshiden qaýipsizdik úshin kerek. Jazymen taǵy da jumysty jalǵastyramyz. Keminde 500-ge jýyq plıta aýystyrylýy kerek. Bul 2-3 aı merzimdi talap etedi», - dedi Ońdasyn Orazalın.
