Aqtóbe áýejaıy jumysyn qaıta jandandyrdy
AQTÓBE. QazAqparat – Álııa Moldaǵulova áýejaıy jumysyn qaıta jandandyrdy. Búgin Nur-Sultan – Aqtóbe baǵytynda bir reıs keldi, dep habarlaıdy QazAqparat tilshisi.
Aqtóbedegi áýejaı 17-naýryz kúni jumysyn ýaqytsha toqtatyp, jóndeý jumystary júrgizildi.
Onda ushý-qoný jolaǵyndaǵy plıtalar aýystyryldy. Kezekti komıssııa 25-naýryz kúni kelip, búgin sheshimin shyǵarǵan.
«Aqtóbe áýejaıy jumysyn qaıta jandandyrdy. Qaýipsizdik úshin tek kúndizgi ýaqytta ushyp-qonýǵa ruqsat berilip otyr. Búgin jóndeýden keıin Nur – Sultan – Aqtóbe baǵytynda bir reıs keldi. Ózge kompanııalarǵa da habarlandyrý berildi», - dedi «Álııa Moldaǵulova halyqaralyq áýejaıy» AQ basqarma tóraǵasy Dastan Malıev.
Eske salsaq, oblystyq qoǵamdyq keńes múshelerimen kezdesý kezinde oblys ákimi Ońdasyn Orazalın áýejaıda keminde 500-ge jýyq plıta aýystyrylýy kerek ekenin aıtty. Bul jumys 2-3 aı merzimde aıaqtalýy tıis edi.
