Aqtóbe áýejaıy mańynda poshta sálemdemelerin jetkizý ýaqytyn qysqartatyn hab salynady

AQTÓBE. QazAqparat – Aqtóbe halyqaralyq áýejaıynda sálemdemelerdi suryptaýǵa, jetkizý ýaqytyn qysqartýǵa múmkindik beretin termınal hab salynady. Qurylys jumysy bıyl bastalady, dep habarlaıdy QazAqparat tilshisi.

Aqtóbe oblysynyń ákimi Eraly Toǵjanov pen «Qazposhta» AQ Basqarma tóraǵasy Ásel Janasova ekijaqty memorandýmǵa qol qoıdy. Endi Aqtóbede termınal hab salynady.

«Hab tek Aqtóbe oblysyn ǵana emes, elimizdiń barlyq batys óńirin de qamtıtyn bolady. Osy jobanyń arqasynda poshta jóneltilimderin jetkizý merzimi aıtarlyqtaı qysqarady. Biz óz tarapymyzdan jan-jaqty qoldaý kórsetýge daıynbyz», - dedi oblys ákimi Eraly Toǵjanov. Ásel Janasovanyń aıtýynsha, jańa hab álemdik standarttarǵa sáıkes salynady. Zamanaýı suryptaý jabdyqtarymen qamtylady.

«Búginde ınternet arqyly satyp alý damyp keledi. Sonymen birge jiberiletin sálemdemeler sany da artty. Bul – Qazaqstan úshin de ózekti álemdik trend. Kórsetiletin qyzmetti jaqsartý maqsatynda biz Astana, Almaty jáne Aqtóbe áýejaılarynda termınal habtar salýdy josparlap otyrmyz. Óńir basshysynyń qoldaýynyń arqasynda Aqtóbe oblysy osy jobany iske asyrýǵa birinshi bolyp kiristi. Hab ashylsa, shetelden, mysaly, Amerıkadan, Germanııadan jáne Qytaıdan taýarlardy jetkizý merzimi 45 kúnnen 10 kúnge deıin qysqarady», - dedi «Qazposhta» AQ Basqarma tóraǵasy Ásel Janasova.

Sondaı-aq, «Halyqtyń tabysyn 2025 jylǵa deıin arttyrý baǵdarlamasy» keshendi jospary iske asyrylady. Aqtóbe oblysyndaǵy aýyldarda ornalasqan poshta beketterinde jańa qyzmet kórsetý oryndaryn ashylady. Al statsıonarlyq bólimsheleri joq aýyldarǵa zeınetaqy, járdemaqy jáne jalaqy tólemderin jetkizý qyzmeti qosa atqarylýy múmkin.