«Aqtóbe» áýejaıy ishki reısterdi qabyldaýǵa daıyn
AQTÓBE. QazAqparat – Aqtóbe áýejaıyna dezınfektsııalyq týnnel qondyryldy, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbe oblysynyń ákimi Ońdasyn Orazalın «Aqtóbe» halyqaralyq áýejaıyna bardy. «Aqtóbe halyqaralyq áýejaıy» AQ Basqarma tóraǵasy Erlan Qusman aımaq basshysyna áýejaıdyń daıyndyǵyn kórsetti. Basqarma tóraǵasy barlyq sanıtarlyq talaptardyń oryndalǵanyn jáne ishki reısterdi qabyldaýǵa daıyn ekendikterin jetkizdi.
Kóliktegi taýarlar men qyzmettik sapasy men qaýipsizdigin baqylaý basqarmasynyń basshysy Baqyt Jumaǵalıev sanıtarlyq talaptar kúsheıtile túsetindigin aıtyp ótti. Azamattar arasynda áleýmettik araqashyqtyqtyń saqtalýy jáne jolaýshylardyń jol júrý qujatymen birge densaýlyǵy týraly anyqtama kórsetýi tıis.
Sondaı-aq, jolaýshylardyń dene qyzýy ólshenip, qujattary tekseriledi, shyǵaryp salýshylar ǵımarat ishine kirmeıdi. Qaýipsizdik maqsatynda áýejaı aldyna dezınfektsııalyq týnnel ornatylǵan. Oblys ákimi azamattardyń densaýlyǵy úshin jasalǵan jumystardy oń baǵalap, álde de birqatar kemshilikterdi qalypqa keltirý qajettigin aıtty.
