Aqtóbe áýejaıy 17 naýryzdan bastap jabylady

AQTÓBE. QazAqparat - 17 naýryzynan bastap Aqtóbe áýejaıynyń ushý-qoný jolaǵyn paıdalaný buzýshylyqtar joıylǵanǵa deıin toqtatylady. Bul týraly QazAqparat Azamattyq avıatsııa komıtetine silteme jasap habarlaıdy.

9 naýryzda QR Indýstrııa jáne ınfraqurylymdyq damý mınıstri Qaıyrbek Óskenbaevtyń tapsyrmasy boıynsha Aqtóbe áýejaıynda ushý-qoný jolaǵyn tekserý júrgizildi.

Tekserýge Aqtóbe oblysy ákimdigi, Azamattyq avıatsııa komıteti, Qazaqstannyń avıatsııalyq ákimshiligi, Álııa Moldaǵulova halyqaralyq áýejaıy jáne Air Astana, SCAT, Qazaq Air áýe kompanııalarynyń ókilderi qatysty.
Keı jerlerde ushý-qoný jolaǵynyń jaǵdaıynda aqaýlar, jaryqshaqtar, áýeaılaq plıtalarynyń, mastıkanyń qabyrshaqtanýy anyqtaldy.
Belgilengen talaptarǵa sáıkessizdikti, sondaı-aq azamattar úshin ushý qaýipsizdiginiń basymdyǵyn eskere otyryp, Qazaqstannyń avıatsııalyq ákimshiligi aǵymdaǵy jyldyń 17 naýryzynan bastap Aqtóbe áýeaılaǵynyń ushý-qoný jolaǵyn paıdalanýdy buzýshylyqtardy joıǵanǵa deıin toqtatý týraly sheshim qabyldady.
Óz kezeginde Aqtóbe oblysynyń ákimdigi qysqa merzimde áýeaılaq plıtalaryn aýystyrý jáne jóndeý jumystaryn júrgizýdi qarjylandyrýǵa daıyn.
Áýejaıdy paıdalanýshy birinshi kezekte aýystyrýdy talap etetin plıtalardy anyqtaı otyryp, tekserý aktisin jasaýda jáne áýeaılaqtyń ushý-qoný jolaǵyna aǵymdaǵy jóndeý júrgizý boıynsha is-sharalar josparyn ázirleýde.