Aqtóbe áýejaıy energetıkalyq jabdyqtardy paıdalaný talabyn saqtamaǵany úshin aıyppul tóleıdi
AQTÓBE. KAZINFORM – Áýejaı ákimshiligi buzýshylyqty bıyl tamyz aıyna deıin joıýy tıis. Tekserýden soń 25 AEK mólsherinde aıyppul salyndy.
Memlekettik energetıkalyq qadaǵalaý jáne baqylaý komıtetiniń Aqtóbe oblysy boıynsha aýmaqtyq departamenti óńirdegi energetıka sýbektileriniń jumysyn tekseredi. Bul joly «Álııa Moldaǵulova atyndaǵy halyqaralyq áýejaıǵa» AQ-ndaǵy elektr energetıkasy salasyndaǵy zańnama talaptarynyń saqtalýyn nazarǵa aldy.
- Tekserý nátıjesinde energetıkalyq jabdyqtardy paıdalaný talaptaryna qatysty buzýshylyqtar anyqtaldy. Buzýshylyqtardy bıyl tamyz aıyna deıin joıý jóninde nusqama berildi. Tekserý qorytyndysy boıynsha Ákimshilik quqyq buzýshylyq týraly kodeksiniń 300-babynyń 3-bóligi boıynsha ákimshilik jaýapqa tartylyp, 25 AEK mólsherinde aıyppul salyndy,- dep habarlady Memlekettik energetıkalyq qadaǵalaý jáne baqylaý komıtetiniń Aqtóbe oblysy boıynsha aýmaqtyq departamenti.
Aıta keteıik, departament mamandary óńirge elektr qýatyn taratyp otyrǵan «Energosıstema» JShS, «QTJ» UK» AQ-y fılıanyń magıstrlik elektr jeliler bólimi, «Aqtobe su-energy group» AQ, «Batys tranzıt» AQ, «KEGOS» AQ Aqtóbe elektr jeliler fılıaly, «SNPS-Aqtóbemunaıgaz» AQ, «Á. Moldaǵulova atyndaǵy áýejaı» AQ-nyń jumysyn únemi baqylap otyrady. Tekserý de jyl saıyn josparly júrgiziledi.
