Aqtóbe - Atyraý tasjolynyń qurylysyna jergilikti materıaldar paıdalanylady
AQTÓBE. QazAqparat - Aqtóbe-Atyraý tasjolyna shırek ǵasyr bolyp, qazir qoldanystan shyǵyp tur. Ortalyq pen batysty jalǵaıtyn joldyń qurylysy búgin bastaldy, dep habarlaıdy QazAqparat tilshisi.
Aqtóbe-Atyraý baǵytyndaǵy tasjoldy jóndeý jumysy 2018-2020 jyldary júrgiziledi. Jol keńeıip, halyqaralyq talapqa saı salynady, jaryqtandyrylady. Jobalyq-smetalyq qujat daıyndaǵan kezde birneshe dúkendi buzý qarastyrylǵan.
«Bul jolda júrý múmkin emes edi. Elbasy Nursultan Nazarbaevtyń «Nurly jol» baǵdarlamasy aıasynda joldyń jobalyq-smetalyq qujaty daıyndaldy. Aqtóbe oblysyna tıesili 329 shaqyrym joldyń 79 shaqyrymy І kategorııamen, ózgesi ІІ tehnıkalyq kategorııamen salynady. Qazirgi kezde joldyń jamandyǵyna qaramastan táýligine 14 myń kólik júredi»,- dedi «QazAvtoJol» AQ Aqtóbe oblystyq fılıal dırektory Baǵlan Baımaǵambetov.
Aqtóbe-Atyraý tasjolyn tek jergilikti merdigerler emes, Italııa, Ázerbaıjan, Túrkııa, Koreıa elderiniń qurylys kompanııalary keldi. Barlyǵy 3 myńǵa jýyq adam jumys isteıdi. Jol qurylysyna qajetti qarjy Azııa damý banki men Islam bankinen alyndy.
«Joldyń adam úshin mańyzy zor. Jol arqyly ekonomıkanyń basqa salalary da damıdy. Memleket basshysy Nursultan Nazarbaev osy baǵytta úlken jumys atqaryp jatyr. «Nurly jol» baǵdarlamasy arqyly Qazaqstannyń barlyq oblys ortalyǵy Astanaǵa qosylady. Qazir jospar 90 paıyzǵa oryndaldy. Tek Atyraý, Aqtaý, Arqalyq qalalary qalyp otyr. Joldar iske qosylǵan kezde Qazaqstannyń barlyq oblystary zamanaýı jolmen baılanysady, ortalyqpen qosylady, tranzıttik kólikterge jaǵdaı jasalady. Eýropa men Azııanyń arasyndaǵy qarym-qatynas jandanady»,- dedi Aqtóbe oblysynyń ákimi Berdibek Saparbaev.
Tasjol qurylysy kezinde jergilikti qurylys materıaldary paıdalanylady jáne jumysshylar da óńirden alynady. Jospar boıynsha úsh jylda oblys bıýdjetine 200 mıllıard teńge qarjy túsýi tıis. Jol qurylysynyń bastalýyna merdiger kompanııa basshylary men Investıtsııalar jáne damý mınıstrliginiń Avtomobıl joldary komıtetiniń tóraǵasy Mereke Pishembaev qatysty.
«Elbasy tapsyrmasy boıynsha Ortalyq-Batys dálizimen Aqtóbe-Atyraý jol ýchaskesiniń qurylysy bastaldy. Jol qurylysy kezinde Qaraýylkeldi jáne Shubarqudyq aýylynan aınalma jol salynady. Jergilikti merdigerler de qurylys jumystaryn júrgizedi. Qurylysqa qajetti qıyrshyq tas, qum sekildi materıaldar osy jerden alynady»,- dedi Investıtsııalar jáne damý mınıstrliginiń Avtomobıl joldary komıtetiniń tóraǵasy Mereke Pishembaev.
