«Aqtóbe-Atyraý» tasjolynyń qurylysy qashan aıaqtalady
ATYRAÝ. QazAqparat - Jobanyń Maqat-Dossor baǵyty keler jyly aıaqtalady, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Búgingi tańda Maqat-Dossor bóligindegi uzyndyǵy 17 km bolatyn ýaqytsha aınalma joldyń qurylysy aıaqtaldy. Negizgi joldyń eski tósemi tolyqtaı alynyp, 12 sý ótetin qubyr men 2 mal ótetin ótkeldiń qurylysy aıaqtaldy.
Búgingi kúni 139 birlik arnaıy tehnıka jumysqa tartyldy, Onyń 42-si merdiger mekemeniń óz tehnıkasy jáne 97-i kelisimshart negizinde jalǵa alynǵan tehnıkalar bar.
Atalǵan baǵyt boıynsha 15,4 shaqyrymdyq joldyń 2 (eki) asfalt qabaty tóselýde. Asfalttyń sońǵy 3-shi qabatyn kelesi jyly tósep, 2019 jyldyń maýsymynda merdiger mekeme jalpy jumystardy aıaqtaıdy.
Qazirgi tańda joba aıasynda 330 adam jumyspen qamtylǵan, onyń 142-i jergilikti turǵyndar. Qazaqstannyń basqa aýmaǵynan kelgen mamandarǵa 150 oryndyq vahtalyq qalashyq iske qosylyp, jumysshylar 3 mezgil tamaqtandyrylady. 
«Dossor men Maqattyń ortasynda jol salynyp jatyr. Halyqqa qolaıly bolatyn boldy. Burynǵy eski jol jaǵdaıy nashar edi, jańa jol aýyl turǵyndaryna jaqsy kómek bolady dep oılaımyn. Joldyń sapasy jaqsy, 2-3 qabat asfalt tóselýde»,-deıdi Maqat aýdanynyń turǵyny Salaýat Kýshalıev.
