Aqtóbe - Atyraý tasjolynyń qurylys jumystary sáýirde bastalady
AQTÓBE. QazAqparat - Aqtóbe - Atyraý tasjolynyń qurylys jumystary sáýir aıynda qaıta bastalady. Qazir merdigerler men jergilikti qurylys kompanııalary kelisimshartqa qol qoıyp jatyr, dep habarlaıdy QazAqparat tilshisi.
Aqtóbe-Atyraý tasjolynyń 150 shaqyrymnan astamyn jóndeý jumysy bıyl bastalady. Bul 2018-2020 jyldarǵa arnalǵan joba. Halyqaralyq dálizdi jóndeý kezinde Qazaqstan, Qytaı, Reseı arasyndaǵy baılanysty jandandyrýǵa, taýar aınalymy, kólik qatynasyn jaqsartýǵa múmkindik beredi.
«Jol jóndeýge Azııa damý bankinen zaım alyndy. Qurylys jumystaryn «Todını Kostrýtsıonı Djeneralı S.p.A» AAQ men «SPIK Akkord» AQ júrgizýge kelisimshart jasaldy. Italııa men Ázerbaıjan kompanııalary 2020 jylǵa deıin qurylys júrgizedi. Eki jylda barlyǵy 700 adam jumysqa tartylady ,- dedi «QazAvtoJol» UK» AQ Aqtóbe oblystyq fılıal basshysynyń orynbasary Asylbek Muhambetqalıev.
Jol qurylysy jumystary kezinde jol-paıdalaný beketteri salynyp, jańartylady. Al jumysshylar «Jumyspen qamtý» baǵdarlamasy aıasynda aýdan, aýyldan alynady. 
«Qazir «Kóktas-Aqtóbe» JShS Bershúgir karerinen, «Tas Qarǵaly» JShS Qarǵaly aýdanynan qıyrshyq tas jetkizý kelisimshartyna qol qoıdy. Qıyrshyq tas temirjolmen jetkiziledi. Al temirbeton buıymdaryn «Stroıdetal» JShS jetkizedi. Sý ótkizý, kópir qurylysy kezinde barlyǵy 1600-den astam temirbeton qajet bolady. Bir sózben aıtqanda, jol salýǵa qajetti barlyq qurylys materıaldary Qazaqstanda shyǵarylǵan»,- dedi «QazAvtoJol» UK» AQ Aqtóbe oblystyq fılıal basshysynyń orynbasary Asylbek Muhambetqalıev.
«Nur Otan» partııasynyń oblystyq fılıalynda ótken partııalyq tyńdaýda «Ortalyq - Batys» tasjolyn qalpyna keltirý jumysynyń jobalyq-smetalyq qujatyn bıyl aıaqtaý josparlanǵany belgili boldy. Bul joldar 2020-2022 jyldary salynýy múmkin.
