Aqtóbe-Atyraý tasjoly qurylysynyń qaýipsizdigin polıtseıler baqylaıdy
AQTÓBE. QazAqparat - Naýryz aıynda Aqtóbe-Atyraý tasjolynyń qurylys jumystary bastalady. Jol qurylysy kezinde qaýipsizdikti polıtsııa baqylaıdy, dep habarlaıdy QazAqparat tilshisi.
Aqtóbelik polıtsııa qyzmetkerleri Batys Eýropa -Batys Qytaı tasjolynyń qurylysy kezinde qaýipsizdikti qadaǵalaǵan bolatyn. Endi olar aldaǵy 4 jylda Aqtóbe-Atyraý tasjolyndaǵy jol-kólik oqıǵalarynyń aldyn alý jumystaryn qaraıdy. ІІD Ákimshilik polıtsııa basqarmasy merdiger kompanııalardy jınap, zańnamalardaǵy talaptardy túsindirdi. Ákimshilik polıtsııa basqarmasy, jol jáne tehnıkalyq bóliminiń bastyǵy Erkin Ótegenniń aıtýynsha, qurylys jumystary kezinde kólikterge ýaqytsha jol salynýy tıis.
«Negizgi jol qurylysy bastalǵan kezde kólikke arnalǵan ýaqytsha jol ashylady. Sonymen qatar, sol jolda arnaıy belgiler ornatylýy tıis. Árbir 12 saǵat saıyn sý sebilip, shańy basylady. Ári jol qurylysy kezinde qaýipsizdik eskertýleri anyq kórinýi tıis. Qurylys jumystary naýryz aıynda bastalady. Biz qurylysty 2021 jylǵa deıin baqylaımyz»,- dedi Erkin Ótegen.
Aqtóbe-Atyraý tasjoly Alǵa, Muǵaljar, Temir, Baıǵanın aýdandaryn qamtıdy. Ár aýdandaǵy jol jáne tehnıkalyq bólim ókili ózine tıisti aýmaqty baqylap, zań talaptary buzylsa ákimshilik hattama toltyrady.
«Eger jol belgisi ornatylmasa, 1-3 kún ýaqyt beriledi. Talap saqtalmasa polıtsııa qyzmetkeri uıǵarym beredi. Der kezinde qatelikti joımasa, sotqa aryz joldanady. Qazir aıyppul 15 AEK bolyp tur. Bul shamamen 36 myń teńgeden asady. Asa úlken quqyq buzýshylyq anyqtalsa, merdiger kompanııanyń ókilettiligi toqtatylady»,- dedi Erkin Ótegen.
Aqtóbe oblystyq ІІD baspasóz qyzmetiniń habarlaýynsha, Aqtóbe-Atyraý tasjoly óte qaýipti aımaq sanalady. Bul joldyń sapasy nashar, sáıkesinshe jol-kólik oqıǵasy jıi tirkeledi. 2017 jyly 19 oqıǵa tirkelip, 29 adam jaralandy. Al 8 adam osy respýblıkalyq tasjolda mert boldy.
Buǵan deıin habarlaǵanymyzdaı, Aqtóbe-Atyraý tasjolynyń qurylys jumystary kezinde jergilikti materıaldar paıdalanylady.
