«Aqtóbe-Atyraý-Astrahan» jolyn jóndeýge qolaısyz aýa raıy men qujattardyń kesh rásimdelýi kedergi keltirýde
AQTÓBE. QazAqparat - «Aqtóbe-Atyraý-Astrahan» respýblıkalyq tasjolynyń qurylysyna Ulttyq qordan 3,7 mıllıard teńge qarastyrylǵan. Jol jóndeý jumysyna aýa raıynyń qolaısyzdyǵy men memlekettik organdardyń qujat rásimdeýdi keshiktirýi kedergi boldy, dep habarlaıdy QazAqparat tilshisi.
«Aqtóbe-Atyraý-Astrahan» tasjolynynyń 220-236 shaqyrymyn jóndeý jumysy jalǵasyp jatyr. Jobany iske asyrý kelisim shartyna 2015 jyldyń sońynda qol qoıylyp, «GazDorProekt» JShS-y jobalaý jumysyn júrgizdi. Tehnologııalyq jumystar jobasyn «JolKonsaltıng» kompanııasy iske asyrdy. «Iveta So» merdiger mekemesi qazirgi ýaqytta qurylysty júrgizip jatyr. Jobanyń jalpy quny - 3,6 mıllıard teńge.
«Ótken jyly 1,6 mıllıard teńgeden astam qarjy jumsalyp, jol jóndeldi. Bıyl «Aqtóbe-Atyraý-Astrahan» tasjolynynyń 220-236 shaqyrymyn jóndeý jumysy aıaqtalýy tıis. Qazirgi ýaqytta 333 mıllıon teńge jumsalyp, joldyń bir bóligi tapsyryldy. Qurylysqa qajetti qıyrshyq tas, bıtým, tsement, roýdzaım jetkizilip jatyr. Jol qurylysyna 72 tehnıka jumyldyryldy, 100-den astam adam jumys istep júr. Qurylys jumystary kezinde aýa raıynyń qolaısyzdyǵy keri áserin tıgizdi. Sonymen qatar, memlekettik organdar karer salýǵa ruqsat berý qujatyna der kezinde kelisim bermedi. Qurylys sáýir aıynyń ekinshi onkúndiginde bastaldy»,- dedi «QazAvtoJol» ulttyq kompanııasy AQ-nyń Aqtóbe oblystyq fılıalynyń bas mamany Erdildá Qalaǵanov.
Aıta keteıik, jol qurylysy osy jyldyń qarasha aıynda aıaqtalady dep josparlanǵan. Buǵan deıin habarlaǵanymyzdaı, alǵashqy kezde respýblıkalyq mańyzy bar tasjoldy jóndeýge 40-tan astam merdiger mekeme nıet bildirdi. https://kaz.inform.kz/news/koktemde-aktobe-astrahan-taszholyn-zhondeu-zhumysy-bastalady_a3005499 Qazirgi ýaqytta joldyń qurylysyn, qarjynyń tıimdi jumsalýyn Aqtóbe oblystyq máslıhatyndaǵy «Nur Otan» partııasynyń fraktsııasy janyndaǵy kólik-logıstıkalyq ınfraqurylymdy damytý komıssııasy baqylap otyr.
