Aqtóbe – Atyraý tasjolynyń qurylysyn aıaqtaý úshin qaıta túzetý engiziledi

Aqtóbe – Atyraý tasjolynyń Aqtóbe-Qandyaǵash aralyǵy bıyl tolyq aıaqtalmaıdy. QR Kólik mınıstri Marat Qarabaev onyń birneshe sebebin atady, dep habarlaıdy Kazinform.

Aqtóbe – Atyraý tasjolynyń qujattamasy 2016 jyly jasalyp, sońǵy 2 jylda ǵana qurylys júrdi. Bıyl Aqtóbe aýmaǵyndaǵy jol túgel qoldanysqa berilýi tıis edi. Biraq taǵy bir jylǵa keıinge shegerildi.

«Bıtým tapshylyǵy boldy. Elimizde mundaı problema bar. Jyl saıyn Reseıden ákelemiz. Bıyl 100 myń tonna ımporttaımyz degen kelisim jasaldy. Óte az bul. Keıin QR Premer-mınıstri men onyń orynbasary reseılik áriptesterimen kelisip, qosymsha 200 myń tonna alýǵa ruqsat berildi. Qujattardy rásimdep júrgende bir jarym aıdy joǵaltyp aldyq. Bul – bıyl keri áser etken faktor. Jalpy aıtar bolsaq, merdiger kompanııa shıraq qımyldaýy kerek edi. Olar boıaý boldy. Sonymen birge jobalyq-smetalyq qujaty 2016 jyl jasalǵan, eski. Qazirgi baǵa ózge. Sondyqtan túzetýge jiberildi. Qaıta aıtamyn, merdiger tez jumys istegende, túzetý bolmas edi. Ekinshi jaǵynan merdigerlerdi de túsinýge bolady. Jobanyń jasalǵanyna 7 jyl boldy. Osy aralyqta ​ baǵa​ qatty ózgerdi», - dedi QR Kólik mınıstri Marat Qarabaev.

Qazir túzetýge berilgen qujat memlekettik saraptamadan ótip jatyr. Endi qurylys 2024 jyly aıaqtalady dep josparlandy. ​

«Qurylysy uzaqqa sozylǵan Atyraý – Astrahan, Aqtóbe – Qandyaǵash, Almaty – Astana, Taldyqorǵan – Óskemen joldary keler jyly aıaqtalady dep otyrmyz. Bul týraly turǵyndar jıi aıtyp, kóterdi. Bıyl osy baǵytta kóp jumys atqaryldy. Halyqtyń narazylyǵyn túsinemiz. Keshirim suraımyz. Adamdar úshin qurylystyń uzaqqa sozylýy qıyndyq týǵyzady. Biz keler jyly osy qurylysty aıaqtaımyz dep ýáde beremiz», - dedi QR Kólik mınıstri Marat Qarabaev.

Eske salsaq, Aqtóbe – Qandyaǵash jolynyń qurylysyna buǵan deıin 60 mlrd teńgeden astam qarjy bólingeni aıtyldy.