«Aqtóbe» - «Astana» matchyn jarty saǵat boıy syǵalap qarap otyrdym – jankúıer bala

AQTÓBE. QazAqparat – Aqtóbelik oqýshy Dıas Sáken «Aqtóbe» - «Astana» matchyna bılet tappaı, jarty saǵat boıy stadıon syrtynda syǵalap otyrdy. Ol ózine abonement syılaýdy tapsyrǵan oblys ákimine alǵysyn jetkizdi, dep habarlaıdy QazAqparat tilshisi.

Aqtóbelik Dıas Sáken bir-aq sátte elimizge tanyldy. Ol keshe «Aqtóbe» - «Astana» matchyn tamashalaýǵa barǵanymen, stadıonǵa kire almaı qalǵan.

Sóıtip oıyndy syǵalap qarap, shyn jankúıer ekenin bildirdi.

«Matchqa bıletti elektrondy túrde satyp alǵym keldi. Biraq bolmady. Keıin kassadan alǵym keldi. Onda da bolmady. Oıyn kúni stadıondy bir aınalyp shyqtym. Negizi oıyndy tamashalaýǵa atammen birge bardym. Keıin úıge qaıtamyz dep turǵanda atamnyń kóligi kóp mashınanyń ortasynda qalyp qoıǵanyn kórdik. Ýaqytty tekke ótkizbes úshin men stadıonǵa qaıta bardym. Syrtynan qaraıyn dep sheshtim de syǵalap otyrdym. Qonaqtar otyratyn orynnyń artynda syǵalaıtyn jer bar. Sonda alań jartylaı kórindi. Otyrǵanyma 30 mınýttaı boldy. Meniń túrimdi kórgen Aıdyn Qojahmetov ishki kirgizip aldy. Tipti «biz uttyq» dep qushaqtap aldy. Óte áserli oıyn dep aıtyp edim. Sóıtip matchtyń ortasynan bastap oıyndy stadıonda tamashaladym», - dedi aqtóbelik jankúıer Dıas Sáken.

Dıas qazir jazǵy demalysta júr. Bos ýaqytynda fýtbol, voleıbol oınaıdy.

«Fýtboldy kompıýterde oınap qyzyqtym. Keıin arnaıy úıirmege qatystym. Ózimniń armanym – fýtbolshy bolý. Keıde kásipker de bolǵym keledi. Ózim bıyl №56 orta mekteptiń 8-synybyn bitirdim», - dedi ol.

Dıas Sáken maýsymdyq abonement alǵanyna qýanyshty. Ol erekshe syı jasaǵan oblys ákimi Ońdasyn Orazalınge alǵysyn bildirdi.