Aqtóbe - Astana áýe reısine rezervtik ushaq jiberiledi

AQTÓBE. KAZINFORM - Aqtóbe - Astana reısine rezervtegi ushaq jiberiledi. Jolaýshylar búgin túnde ushýy múmkin.

«Álııa Moldaǵulov halyqaralyq áýejaıy» AQ Aqtóbe - Astana reısine qatysty habarlama taratty.

- FlyArystan áýe kompanııasyna tıesili FS7394 reısiniń ushýy 17 aqpan saǵat 00:30-da josparlanǵan. Alaıda tehnıkalyq sebepterge baılanysty reıstiń ushýy keıinge qaldyryldy. Qazirgi ýaqytta FS7394 reısin oryndaý úshin rezervtik áýe kemesi ushyp keledi dep kútilýde. Ushý 18 aqpan saǵat 00:15-te josparlanyp otyr, - dep habarlady «Álııa Moldaǵulov halyqaralyq áýejaıy» AQ-dan.

Eske salsaq, FlyArystan áýe kompanııasynyń Aqtóbe-Astana baǵytyndaǵy reısi birneshe ret keıinge shegerildi. Jolaýshylar tirkeýden ótip, ushaq bortynda 4 saǵat boıy otyrǵan. Keıin áýejaı ǵımaratyna qaıta ótip, qonaqúıden oryn talap etken.

Munda bárine birdeı oryn berilmeı, jolaýshylar páter jaldap, týǵan-týystarynyń úıin panalady.