Aqtóbe áskerı ınstıtýty 5 myńnan astam maman daıarlady
ASTANA. KAZINFORM — Aqtóbe qalasynda oblys ákimdigi ǵımaraty aldyndaǵy alańda eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteri áskerı ınstıtýtynyń 29-shy túlekterin shyǵaryp salý rásimi ótti.
Saltanatty sharaǵa Aqtóbe oblysynyń ákimi Ashat Shaharov, Áýe qorǵanysy kúshteri bas qolbasshysynyń orynbasary avıatsııa general-maıory Rýslan Qońyrov, áskerı ınstıtýttyń professorlyq-oqytýshylyq quramy, Qarýly kúshterdiń ardagerleri, sondaı-aq túlekterdiń ata-analary men jaqyndary qatysty.
– Otan qorǵaýshy mamandyǵyn tańdaý – ómir jolyndaǵy abyroıly sheshim. Sizderdiń mindetterińiz – aǵa býyn ofıtserleriniń erligi men batyldyǵyn úlgi etý. Ol úshin óz isin jetik biletin kásibı maman ǵana emes, naǵyz komandır ári tálimger bolý qajet. Qyzmette tabandylyqtyń ónegesin kórsetińizder, – dedi avıatsııa general-maıory Rýslan Qońyrov.
Bıylǵy túlekter qatarynda 42 ushqysh pen 25 ınjener bar. Saltanatty rásim barysynda jas leıtenanttarǵa dıplomdar men tósbelgiler tabystaldy.
Bul kún leıtenant Myńjasar Qýanysh úshin erekshe este qaldy. Saltanatty shara kezinde ol súıiktisi Áıgerimge úılenýge usynys jasap, boıjetken kelisimin berdi. Osylaısha áskerı oqý ornynan túlep ushqan jas ofıtserdiń qyzmet jolynda ǵana emes, mahabbatqa, ózara qoldaýǵa jáne ortaq armanǵa negizdelgen jas otbasynyń ómirinde de jańa kezeń bastaldy.
Aıta keteıik, Áýe qorǵanysy kúshteri áskerı ınstıtýty Qorǵanys, Tótenshe jaǵdaılar, Іshki ister mınıstrlikteri men Ulttyq qaýipsizdik komıtetine avıatsııalyq mamandar daıarlaıdy. Oqý orny qurylǵan sátten bastap 5 myńnan astam mamandy daıarlap, sapqa qosty.
Aıta ketelik áskerı kolledj 30 jylda 4 myńǵa jýyq serjant daıarlady.
