«Aqtóbe» arnaıy ekonomıkalyq aımaǵynyń aýmaǵy keńeıtiledi
ASTANA. KAZINFORM — «Aqtóbe» AEA qoldanystaǵy 858 gektar aýmaǵyna Alǵa, Muǵaljar jáne Hromtaý aýdandarynda ornalasatyn jalpy aýdany 337 gektar quraıtyn úsh jańa qosalqy aımaq qosylady, dep habarlaıdy oblys ákimdiginiń baspasóz qyzmeti.
Vedomstvo atap ótkendeı, nátıjesinde arnaıy ekonomıkalyq aımaqtyń jalpy aýmaǵy 1 195 gektardy quraıdy.
QR Úkimetiniń 2026 jylǵy 31 shildedegi № 687 qaýlysymen «Aqtóbe» AEA aýmaǵyn keńeıtýge qatysty tıisti ózgerister engizildi. Qaýly ınvestıtsııalyq jobalardy iske asyrýǵa arnalǵan qosymsha óndiristik alańdar qalyptastyrýdy kózdeıdi.
«Aqtóbe» AEA quramyna engiziletin jańa qosalqy aımaqtar:
· Hromtaý aýdany — 120 gektar. AEA quramyna Hromtaý qalasynyń jobalanatyn ındýstrııalyq aımaǵynyń aýmaǵy engizildi.
· Muǵaljar aýdany — 137 gektar. Qosalqy aımaq Qandyaǵash qalasynyń ońtústiginde ornalasady. Injenerlik jelilerge qosylý núkteleri anyqtalǵan.
· Alǵa aýdany — 80 gektar. Qazirgi ýaqytta qosymsha ınjenerlik ınfraqurylym múmkindikterin aıqyndaý, qosylý núktelerin anyqtaý jáne tehnıkalyq sharttardy alý boıynsha jumystar júrgizilip jatyr.
«Aqtóbe» AEA qatysýshylary retinde ekonomıkanyń túrli salalarynda ınvestıtsııalyq jobalardy iske asyratyn otandyq jáne sheteldik ınvestorlar tirkele alady. Sonymen qatar kásiporyndar arasyndaǵy óndiristik kooperatsııany damytýǵa, birlesken jobalardy iske asyrýǵa jáne ortaq ınfraqurylymdy tıimdi paıdalanýǵa múmkindik beretin ónerkásiptik klasterler qurý kózdelgen.
— AEA aýmaǵyn keńeıtý óńirdiń ınvestıtsııalyq tartymdylyǵyn arttyrýǵa, jańa jumys oryndaryn ashýǵa, óńdeý ónerkásibin damytýǵa jáne Aqtóbe oblysy aýdandarynyń óndiristik áleýetin nyǵaıtýǵa múmkindik beredi, — delingen ákimdik taratqan aqparatta.
Budan buryn Aqtóbede páter almaq bolǵan 59 adam alaıaqtarǵa aldanyp qalǵanyn jazǵanbyz.
