«Aqtóbe» arnaıy ekonomıkalyq aımaǵynda qolǵa alynatyn kásip túrleri belgili boldy

AQTÓBE. KAZINFORM - «Aqtóbe» arnaıy ekonomıkalyq aımaǵy qurylyp, onda 38 kásip túri qolǵa alynady. Qujat Ashyq NQA portalyna jarııalanyp, talqylaýǵa shyǵaryldy.

Ashyq NQA portalynda arnaıy ekonomıkalyq aımaqtaǵy qyzmetterdiń basym baǵyttary kórsetilgen. Onda toqyma materıaldaryn, kıimder óndirý, túrli qurylys materıaldaryn jáne elektrondyq tehnıka shyǵarý baǵyty bar. Sonymen birge ushaq, avtomobıl jáne mototsıkl qozǵaltqyshtarynan basqa qozǵaltqyshtar men týrbınalardy, gıdravlıkalyq jáne pnevmatıkalyq jabdyqtardy, avtomobılderge arnalǵan elektrondyq jabdyqtardy óndirý qyzmeti tizimge engen. Áýe jáne ǵaryshtyq ushý apparattaryn jóndeý jáne tehnıkalyq qyzmet kórsetý, júk áýe kóliginiń qyzmeti, júk saqtaý jáne qoımalaý, qurlyq kóliginiń kómekshi qyzmeti sekildi birneshe sala qamtylǵan. «Arnaıy ekonomıkalyq aımaqtar aýmaǵynda júzege asyrylatyn qyzmettiń basym túrleriniń tizbesin jáne Arnaıy ekonomıkalyq aımaqtar bólinisinde qyzmettiń basym túrleriniń tizbesin júrgizý qaǵıdalaryn bekitý týraly» buıryq 5 naýryzǵa deıin talqylaýda bolady. 

Buǵan deıin Aqtóbe halyqaralyq áýejaıynyń janynan 858 gektar jer arnaıy ekonomıkalyq aımaqqa beriletini belgili boldy. Sonymen birge Ónerkásip jáne qurylys mınıstrligi Aqtóbe arnaıy ekonomıkalyq aımaǵyn qurý týraly Úkimet qaýlysynyń jobasyn jarııalady.