«Aqtóbe - Almaty» poıyzynyń jolserigi júkti áıeldi bosandyryp aldy
NUR-SULTAN. QazAqparat - «Jolaýshylar tasymaly» AQ-nyń «Batys» óńirlik fılıalynyń «Aqtóbe - Almaty» qatynasyndaǵy № 34 jolaýshylar poıyzynda 2020 jyldyń 5 aqpanynda bala dúnıege keldi, dep habarlaıdy QazAqparat «QTJ» UK» aktsıonerlik qoǵamynyń baspasóz qyzmetine silteme jasap.
«Aqtóbe - Almaty» qatynasyndaǵy №34 jolaýshylar poıyzy júretin joldyń «Bershúgir - Qaıdaýyl» ýchaskesinde 3-shi vagon jolaýshysy Baljan Shernııazovanyń tolǵaǵy bastalady jáne de poıyz basshysy Nurjan Tapaev tolǵaq qysqan kelinshekke kómek kórsetý úshin barlyq qajetti sharalardy qabyldaıdy. Jaqyn mańdaǵy stantsııaǵa jedel járdem shaqyrtyp, ishki daýys zoraıtqysh baılanys arqyly medıtsınalyq bilimi bar jolaýshylardan kómek suraıdy.
Poıyzda medıtsınalyq bilimi bar jolaýshy tabylmaǵandyqtan, №9 vagon jolserigi Ǵalııa Tursymatqyzy jolaýshyny ózi bosandyryp alady.
Shalqar stantsııasyna kelgen boıda jolaýshy Baljan Shernııazova jańa týǵan sábıimen medıtsına qyzmetkerlerine tabystalady.
Ǵalııa Tursymatqyzy temirjol salasyndaǵy óz eńbek jolyn 2007 jyly bagaj kassırinen bastady, odan keıin ol 2012 jyly «Ekspress» fılıalynda jolaýshylar tasymaly poıyzynyń jolserik mamandyǵyn tańdady, al 2018 jyldyń mamyrynan «Jolaýshylar tasymaly» AQ «Batys» óńirlik fılıalynda jolserik bolyp jumys isteıdi.
Qazirgi kezde bosanǵan kelinshek pen sábıdiń densaýlyq jaǵdaıy jaqsy jáne kómek kórsetkenderi úshin temirjol qyzmetkerlerine alǵys aıtty.
