Aqtóbe – Almaty baǵytyndaǵy áýe reısinde jolaýshy kóz jumdy

AQTÓBE. KAZINFORM – Oqıǵa keshe túnde boldy. DV 712 reısi Almatyǵa baǵyt alǵanymen, Aqtóbe áýejaıyna qaıta oraldy. 

SCAT áýe kompanııasynyń DV 712 reısi keshe keshkilik Aqtóbe-Almaty baǵytynda jolǵa shyqty. Alaıda kóp uzamaı jolaýshylardyń biri ózin jaısyz sezindi. Sol kezde áýe komandıri Aqtóbe áýejaıyna qaıta oralýǵa sheshim qabyldaıdy. Ushaq saǵat 22:50-de Aqtóbe áýejaıyna qaıta qondy.

– Ushaq áýejaıǵa qorǵan soń shuǵyl medıtsınalyq kómek kórsetildi. Alaıda jolaýshyny aman alyp qalý múmkin bolmady. Reıstiń barlyq jolaýshysy ushaq bortynda boldy. Avıatsııanyń qaýipsizdik talaby osy. 9-jeltoqsan kúni saǵat 01:36-da áýe reısi Almatyǵa baǵyt aldy, - dep habarlady Álııa Moldaǵulova atyndaǵy halyqaralyq áýejaıdyń baspasóz qyzmeti.

Aqtóbe oblystyq densaýlyq saqtaý basqarmasynyń habarlaýynsha, jolaýshy jedel járdem brıgadasy jetkenshe kóz jumǵan. Sot-medıtsınalyq saraptamasy taǵaıyndaldy. 

Eske salsaq, Densaýlyq saqtaý mınıstri ushaqta jaǵdaıy nasharlaǵan jolaýshyǵa alǵashqy medıtsınalyq kómek kórsetti. Oqıǵa Astana-Almaty baǵytyndaǵy KS 622 áýe reısinde bolǵan.