Aqtóbe áli qoqystan tazartylmaı jatyr
AQTÓBE. QazAqparat - Aqtóbe qalasynda qoqys ýaqtyly shyǵarylmaı jatyr. Berdibek Saparbaev merdiger kompanııalarǵa eki kúnde tazartýdy tapsyrdy, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev qalany aralap, úıilip jatqan qoqysty óz kózimen kórdi. Sol jerde qala tazalyǵyna jaýapty 31 basqarýshy kompanııanyń basshylarymen, sonyń ishinde qalany sanıtarlyq tazalýmen aınalysatyn operatorlarmen kezdesti.
"Eki kúnde ortaq kúsh-jigerimizben qalany tazalaý qajet, birde bir qoqys alańynda qoqys bolmaýy tıis", - dedi oblys basshysy Berdibek Saparbaev.
Eske salsaq, qoqys shyǵaratyn "Taza qala Aqtóbe" memlekettik kommýnaldyq kompanııasy taratylyp, "Aqjol" kompanııasy tarıfti kóterýdi surady. Keıin qala ákimdigi shahar terrıtorııasyn 10 bólikke bólip, qoqys shyǵaratyn kompanııalardy anyqtady. Ázirge olarda arnaıy tehnıka joq. Qala ákiminiń mindetin atqarýshy Qýandyq Qasymovtyń aıtýynsha, ákimdik bir aı boıy merdiger kompanııalarǵa qoqys shyǵaratyn mashınalardy beredi. Keıin ár kompanııa óz arnaıy tehnıkasyn satyp alýy tıis.
Aqtóbe oblysy ákiminiń baspasóz qyzmetiniń habarlaýynsha, óńir basshysy qyzmet kórsetýshi obektilerdiń sany men qoldaǵy bar tehnıkalar týraly surady. Bir kompanııa orta shamamen 500 konteınerlerge qyzmet etetini atap ótildi. «KamAZ» kóligi 1 ret qatynaǵanda shamamen 100-110 konteınerlerdegi qoqysty tıep alady. Aldaǵy ýaqytta qoqys shyǵarýshylar men jergilikti polıtsııa birge jumys isteıdi. Sebebi turǵyndar jıhaz ben eski tehnıkany qoqysqa tastaýdy ádetke aınaldyrǵan. Al talap boıynsha mundaı qajetsiz zattardy turǵyndar óz kúshimen qoqys polıgonyna tapsyrýy tıis.
