Aqtóbe áleýmettik nannan taryǵyp jatqan joq
AQTÓBE.KAZINFORM - Aqtóbe oblysynda áleýmettik nan qory jetkilikti. Óńirdegi «Ramazan», «Atameken» jáne «Nanym» nan shyǵarýshy kásiporyndary naryqty tolyqtaı ónimmen qamtyp otyr. Táýligine 34 myń bólke nan dúken sórelerine jetkizilip, 106 teńgeden satylyp jatyr.
Al «Aqtóbe nan» 1-surypty unnyń bolmaýyna baılanysty áleýmettik nandy pisirýdi ýaqytsha toqtatty. Buǵan - kásiporynnyń «Aqtóbe» ÁKK» AQ aldyndaǵy forvardtyq kelisimshart aıasynda qalyptasqan bereshegine qatysty. Qaryz soma - memlekettik bıýdjetten bólingen 170 mln teńge. Zaýyt bul bereshekti óteýden bas tartyp, esepten shyǵarýdy surap otyr. «Aqtóbe» áleýmettik-kásipkerlik korporatsııasy kúni erteń 1-surypty undy jetkizýge daıyn, tek «Aqtóbe nan» tarapynan kepildeme hat berilý kerek.
– «Aqtóbe nan» JShS basshylyǵy kótergen qaryz somany esepten shyǵarý máselesi júzege asyrylmaıdy. Óıtkeni bul - birinshiden, bıýdjettiń aqshasy. Ekinshiden, aqsha qaıtarylǵan jaǵdaıda biz jańa ónim alamyz, - deıdi aýyl sharýashylyǵy basqarmasynyń bólim basshysy Snejanna Qulekenova.
Búginde óńirde áleýmettik qalypty nandy birneshe kásiporyn óndiredi. Atap aıtqanda, «Ramazan» JShS táýligine 12 myń dana; «Atameken» JShS táýligine 12 myń dana «Nanym» kásiporny táýligine 6 myń dana áleýmettik nan pisiredi. Qazirgi ýaqytta – «Aqtóbe nan» JShS-niń kólemin basqa zaýyttar ıgerip jatyr. Bul naryqtaǵy júktemeni teńestirýge jáne áleýmettik nan jetkiziliminiń úzdiksiz bolýyna múmkindik berip otyr.
Jaýapty qurylymdardyń málimetinshe, áleýmettik nan saýda núktelerine turaqty jetkizilip jatyr. Baǵa turaqtylyǵy saqtalǵan. Sondyqtan óńirde áleýmettik nan boıynsha alańdaýǵa negiz joq.
Buǵan deıin Aqtóbede áleýmettik nan shyǵaratyn kásiporynnyń biri jumysyn toqtatqanyn jazǵan edik.