Aqtóbe, Aqmola jáne Shyǵys Qazaqstan oblystaryndaǵy orman órtteri tolyq sóndirildi
ASTANA. KAZINFORM – 19 shildedegi jaǵdaı boıynsha Qazaqstannyń memlekettik orman qory aýmaǵynda bir orman órti tirkelip, ol tolyq sóndirildi. Bul týraly Orman sharýashylyǵy jáne janýarlar dúnıesi komıteti habarlady.
Vedomstvo málimetinshe, órt Aqtóbe oblysyndaǵy «Qarabutaq» kommýnaldyq memlekettik mekemesiniń aýmaǵynda bolǵan.
Sonymen qatar orman órtterin sóndirý jumystarynyń nátıjesinde 15 shildede Aqmola oblysynyń Ereımentaý óńirinde tirkelgen eki orman órti men 18 shildede Shyǵys Qazaqstan oblysynda shyqqan bir orman órti de tolyq sóndirildi.
– Orman sharýashylyǵy qyzmetkerleri men «Qazavıaormanqorǵaý» RMK mamandarynyń úılesimdi ári jedel is-qımylynyń nátıjesinde orman órtteri qysqa merzimde oqshaýlanyp, tolyq sóndirildi, – delingen komıtet habarlamasynda.
Vedomstvonyń málimetinshe, órt oshaqtaryn erte anyqtaý, kúshter men quraldardy ýaqytyly jumyldyrý, sondaı-aq avıatsııa men jerústi qyzmetteriniń birlesken jumysy tilsiz jaýdyń keń aýmaqqa taralýyna jol bermeı, ony jedel joıýǵa múmkindik berip otyr.
– Aýa temperatýrasynyń joǵarylaýyna baılanysty elimizde orman órtteriniń sany artyp keledi. Osyǵan baılanysty azamattardy tabıǵat aıasynda demalý kezinde órt qaýipsizdigi talaptaryn qatań saqtaýǵa shaqyramyz, – dep málimdedi komıtet.
Aıta keteıik, buǵan deıin Qazaqstannyń úsh óńirinde orman órti tirkelgeni habarlandy.
