Aqtóbe ákimdigindegi órttiń shyǵý sebebi aıtyldy

AQTÓBE. KAZINFORM — Órt elektr togynyń qysqa tuıyqtalýynan bolýy múmkin. TJD aldyn ala boljamdy aıtty. 

Aqtóbe oblystyq TJD ákimdik ǵımaratyndaǵy órtten soń brıfıng ótkizdi. Onda órt sóndirý men qazirgi tergeý jumysy týraly aıtyldy. Keshe jeke quramnan 338 adam, 58 tehnıka jumyldyryldy. Onyń ishinde tótenshe jaǵdaılar qyzmetiniń 34 tehnıkasy men 130 adam bar. Polıtsııa, Ulttyq ulannyń 6655 áskerı bólimi de jumys istedi. Astana aýdany ákimdigi bolsa sý tasıtyn 10 kólik berdi.

— Habarlama saǵat 20:21–de boldy. Órt saǵat 21:19–da órt oqshaýlanyp, 21:52–de tolyq joıyldy. Ákimdik ǵımaratynyń tóbe jabyndysynyń aýdany 2 400 sharshy metr bolsa, onyń 300 sharshy metri jandy. Qylmystyq kodekstiń 292-baby 2-bóligine sáıkes is qozǵaldy. Sotqa deıingi tergep-tekserý júrip jatyr. Órt-tehnıkalyq saraptama taǵaıyndaldy. Keltirilgen shyǵyndy anyqtaımyz. Ákimdik ǵımaratynyń tóbesi aǵash jabyndymen jabylǵan. Boljam boıynsha órtke elektr togynyń qysqa tuıyqtalýy sebep dep eseptep otyrmyz. Kabeldiń janýy toktyń qatty qyzǵanynan bolýy múmkin. Tóbesinde baılanys qyzmetiniń de togy bar, — dedi Aqtóbe oblystyq TJD bastyǵynyń birinshi orynbasary Aıbat Jańabergenov.

Onyń aıtýynsha, 2024 jyldyń qarasha aıynda ákimdikte órt qaýipsizdiginiń erejeleri tekserildi. Sol kezde 7 zań buzý anyqtalyp, eki aı ishinde kemshilik joıyldy. Órt-tehnıkalyq oqý-jattyǵýy da ótken.

— Bıyl ekinshi jartyjyldyqqa oqý-jattyǵý josparlanyp otyr. Ǵımaratta dabyl júıesi bar, biraq ol ishinde. Al tóbesinde dabyl júıesi bolmaǵan soń ishindegisi qosylmady. Órt kezinde evakýatsııa jasalmady. Sebebi keshkilik ákimdik qyzmetkerleri bolmady. 109 qyzmeti men kúzet ózderi shyqty, — dedi Aıbat Jańabergenov.

Aqtóbe oblystyq ishki saıasat basqarmasynyń basshysy Álibek Baıneshovtiń aıtýynsha, ákimdikte barlyǵy myńǵa jýyq adam jumys isteıdi. Onyń teń jartysy memlekettik qyzmetshi. Olar tústen keıin jumysqa qosylady. Qalpyna keltirý jumystary shtab sheshiminde aıtylady.

— 2022 jyly ákimdik ǵımaratyna ishki jóndeý júrgizilgen. 2024 jyly shatyrda aǵymdaǵy jóndeý boldy, — dedi ol.

Eske salsaq, keshe keshkilik Aqtóbe oblystyq ákimdigi ǵımaratynan órt shyqty. Órt aýdany 300 sharshy metrdi qurady. Eshkim zardap shekken joq. Oqıǵa ornynda jedel shtab quryldy. Búgin Aqtóbe oblysy ákimdigi qashyqtan jumys isteıdi. Qazirgi kezde polıtsııa qyzmetkerleri ákimdik ǵımaratyn qorshaýǵa alǵan.