Aqtóbe ákimdigi qoqys suryptaý jelisiniń qurylys merzimin ataı almady
AQTÓBE. KAZINFORM — Jobalyq-smetalyq qujat daıyndaý úshin 140 mln teńgege jýyq qarjy jumsalady. Suryptaý jelisi bar polıgon salý jumysy qaı kezde bastalary belgisiz. Kazinform saýalyna Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasy jaýap berdi.
Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasy saýalǵa jaýap berý úshin Aqtóbe qalasy ákimdiginiń aqparatyna súıengen. Qatty turmystyq qaldyqty suryptaý jelisi bar polıgon salý úshin jobalaý jáne zertteý jumystary ázirlengen. Joba boıynsha suryptaý jelisi bar jańa polıgon salý jumysy 56 gektar jerdiń 30 gektaryn qamtıdy.
— Jobalyq-smetalyq qujattamanyń quny 136,6 mln teńgeni quraıdy. Qazirgi tańda «Qatty turmystyq qaldyqtardy suryptaý jelisi bar polıgon salý» jobalaý jumystary júrgizilip jatyr. Jobalaýshy mekeme — «Krez-Servıs» JShS. Aqtóbe qalasyndaǵy qatty turmystyq qaldyqty bólek jınaý men suryptaýdy engizý máselesin sheshý maqsatynda ákimdik jol kartasyn daıyndady. Jol kartasyna sáıkes jobalyq-smetalyq qujattama saraptamadan ótedi. Odan keıin qurylys-montajdaý jumystary júzege asady. Іske qosý kezinde aýmaǵy 10 gektar bolatyn suryptaý jelisi ornatylady. 20 gektar jerge 20 qatty turmystyq qaldyqtar kartasy ornalastyrylady. Injenerlik jeli tartylyp, iri kólemdegi betondardy maıdalaǵysh ornatylady, — dep habarlady Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasy.
Alaıda basqarma Kazinform-niń qoqys óńdeý zaýytyn salý, onyń jobalyq qýaty, qarjylandyrý kózi týraly saýalyna naqty jaýap qatpady. Sonymen birge Aqtóbe oblysynda qatty turmystyq qaldyqtardy qaıta óńdeý salasyn damytý úshin sońǵy úsh jylda qandaı ınvestıtsııalyq jobalar usynylǵany belgisiz.
Eske salsaq, byltyr qarasha aıynda Aqtóbede eldi mekenderdiń bes paıyzynda ǵana zańdastyrylǵan qoqys polıgony bar ekenin habarlaǵan edik. Jergilikti ákimdik polıgon qurylysy qymbatqa túsetinin aıtty. Aýdan ortalyqtarynyń jobasyna 600-700 mln teńge qajet.
