Aqtóbe ákimdigi bıýdjettiń 6 mlrd teńge qarjysyn qaıda jumsaıdy

Aqtóbe oblystyq máslıhat depýttary búgin 5,9 mlrd teńgeniń qaıda jumsalatynyn qarastyrdy.

Oblystyq qurylys, sáýlet jáne qala qurylysy basqarmasyna 192 mln teńge bólindi. Bul qarjynyń 94 mln teńgesi Baıǵanın aýdany Qaraýylkeldi aýylyndaǵy órt sóndirý deposy ǵımaratynyń qurysyn aıaqtaýǵa, 44 mln teńgesi farmatsevtıka zaýytynyń syrtqy ınjenerlik jelisine jumsalady.

Baıǵanın aýdany Barshaqum aýylyna aýyz sý júrgizý, Qarǵaly aýdany Álimbet aýylyndaǵy shekaranyń ótkizý pýnktiniń qurylysy men Alǵa qalasyndaǵy turǵyn úıdi kúrdeli jóndeýge 182 mln teńge bólindi.

— «Aqtóbe» ÁKK» AQ-nyń jarǵylyq kapıtalyn ulǵaıtýǵa 1 mlrd teńge baǵyttaldy. Qarjy shaǵyn jáne orta bıznes sýbektilerine nesıe berýge jumsalady. Aldaǵy ýaqytta 63 shaǵyn-orta kásiporyn qurylyp, onda 320 turaqty jumys orny ashylady, salyq túsimi jobamen 3,6 mlrd teńge bolady.

Bilim basqarmasyna bólingen 223 mln teńge birqatar bilim berý uıymynyń materıaldyq-tehnıkalyq bazasyn nyǵaıtýǵa jumsalady. Oqýshylardy tasymaldaýǵa 2 avtobýs satyp alynady, — dedi Aqtóbe oblysynyń ekonomıka jáne bıýdjettik josparlaý basqarmasynyń basshysy Nurjan Maqsatov.

Aqtóbe oblystyq sport basqarmasy arnaıy kólik satyp alýǵa jáne respýblıkalyq «Qazaq kúresi» jarysyn uıymdastyrýǵa 89 mln teńge jumsaıdy. Aqtóbe oblystyq mádenıet, arhıvter jáne qujattama basqarmasy aǵaıyndy Jubanovtar memorıaldyq murajaıynda reekspozıtsııa jumystaryn júrgizýge 57 mln teńge aldy.

— Aýyl sharýashylyǵy salasyna kredıt berý jáne lızıng mólsherlemelerin sýbsıdııalaý úshin 1 mlrd teńge qarastyryldy. Sonymen birge Aqtóbe oblystyq polıtsııa departamentiniń materıaldyq-tehnıkalyq bazasyn nyǵaıtýǵa 1 mlrd teńge jumsalady. «Abaıǵa qurmet» aktsııasy aıasynda oblystyq qarjy basqarmasyna 1 mlrd teńge bólindi. Qarjy Abaı oblysyndaǵy Jekpe-jek saraıynyń qurysyna baǵyttalady, — dedi Nurjan Maqsatov.

Aqtóbedegi taǵy bir problema — jedel medıtsınalyq járdem brıgadasynyń jetkiliksizdigi. Qamtý kórsetkishi — 62,4%. Materıaldyq-tehnıkalyq bazasyn nyǵaıtý úshin lızıngke 30 kólik satyp alynady.

Buǵan deıin habarlaǵanymyzdaı, 2026 jylǵa arnalǵan Almatynyń naqtylanǵan bıýdjeti 2 trln 806,4 mlrd teńge kóleminde bekitildi. Astana qalasy máslıhaty kezekten tys otyrysta elorda bıýdjetiniń kiris bóligin 79,4 mlrd teńgege ulǵaıtý týraly naqtylaýdy bekitti.