Aqtóbe ákimi Qarǵaly ózeni mańyndaǵy turǵyndarǵa eskertý jasap, úıinen shyǵýdy surady
AQTÓBE. KAZINFORM – Aqtóbe qalasynyń ákimi Azamat Beket Qarǵaly ózeniniń deńgeıi kóterilýine baılanysty ózen boıyndaǵy birqatar baý-baqsha ujymdaryna qaýip tónip turǵanyn jetkizdi. Bul týraly oblys ákimdiginiń baspasóz qyzmeti málim etti.
Ákim turǵyndardan evakýatsııaǵa daıyn bolyp, úılerinen shyǵýdy surady.
«Sý ózen arnasynan asyp, Qarǵaly alabyna jaqyn ornalasqan Seısmık, Neftıanık, Eko, Solnyshko, Gaýhar sııaqty birneshe baý-baqsha ujymdaryna jaıylyp keledi. Bul jerlerde qazir jaǵalaýdy topyraqpen bekitý jumystary júrip jatyr. Biraq ózen tasıtyn bolsa, munyń ózi jetkiliksiz. Ári erteń nóser jaýyn kútilýde. Bul qazirgi jaǵdaıdy qıyndata túsetini anyq. Sondyqtan turǵyndardan evakýatsııaǵa kelisim berip, úılerińizdi aldyn ala tastap shyǵýdy suraımyn», - dedi Azamat Beket.
«Qazsýshar» RMK Aqtóbe oblystyq fılıaly dırektorynyń orynbasary Ádiljan Álizaq ta Qarǵaly sý qoımasyndaǵy qazir jaǵdaı týraly baıandady. Onyń aıtýynsha, ózen 95% tolǵan.
«Qarǵaly sý toǵanynda 95%-ǵa sý jınalyp tur. Eksplýatatsııa boıynsha 350 tekshe metr sýdy jiberip jatyrmyz. Qarǵaly ózeniniń deńgeıi kóterilýi múmkin. Dál qazirgi sátte aýa raıy qubylyp, jańbyr jaýýyna baılanysty sý qoımasy qosymsha ashylady. Ol ózen sýynyń deńgeıi arnasynan asýyna ákeledi degen boljam bar», - dedi ol.
Aqtóbe oblysy TJ departamentiniń TJ aldyn alý bóliminiń bastyǵy Taras Kovalenko Elek jáne Qarǵaly ózenderi mańyndaǵy jaǵdaı týraly jetkizdi.
«Qurmetti, Elek jáne Qarǵaly ózenderiniń mańynda turatyn Aqtóbe qalasynyń turǵyndary! Temperatýranyń joǵary bolýyna, sondaı-aq jaýyn-shashynnyń kóp túsýine baılanysty sý deńgeıiniń kóterilýi baıqalyp otyr. Aǵynnyń qarqyny údegen jaǵdaıda sý qoımalarynan sý aǵyzý kólemi ulǵaıýy múmkin. Qazirgi ýaqytta olar shtattyq rejımde, qordy az-azdan toltyrý úshin jumys istep jatyr. Jaǵdaı kúrdeli ekenin, sý tasqyny aıaqtalmaǵanyn túsiný qajet. Soltústik bólikte qar qorynyń qaldyqtary bar, olar aǵyndardyń erýi jáne ulǵaıýyna ákeledi. Sondyqtan evakýatsııa júrgizilgen jerlerge oralý qaýipsiz emes. Sý tez kelýi múmkin. Tótenshe jaǵdaıda 101, 112, 109 nómirlerine qońyraý shalý suralady», - dep habarlady Taras Kovalenko.
