Aqtóbe ákimi jastardy mal sharýashylyǵyn damytýǵa shaqyrdy

AQTÓBE. QazAqparat – Aqtóbe oblysynyń ákimi Ońdasyn Orazalın jastardy «Qalany janǵa, dalany malǵa toltyraıyq» degen bastamasyn qoldaýǵa shaqyrdy, dep habarlaıdy QazAqparat tilshisi.

Búgin «Jasyl el» jasaǵy eńbek maýsymyn qorytyndylady. Jaz boıy tazalaý, kógaldandyrý, abattandyrý jumystaryn atqarǵan 80 stýdent Nur-Sultan qalasyna joldama aldy. Olar úsh kún boıy Elordadaǵy tanymdyq, mádenı oshaqtarǵa baryp, qydyra alady. Bul joldamaǵa ıe bolǵandardyń jolaqysy men jatyn orny, tamaǵy, tynyǵýy tegin. Sonymen qatar «Úzdik jasaq» - Maǵadjan tálim baǵy, «Úzdik joǵary oqý orny» - S.Báıishev atyndaǵy Aqtóbe ýnıversıteti, «Úzdik orta oqý orny» - Aqtóbe avtojol kolledji, «Úzdik jumys berýshi» - «Qarǵaly Servıs» JShS, «Úzdik komandır» – Aqtóbe polıtehnıkalyq kolledjiniń stýdenti Aısulý Taǵabergenova, «Úzdik aýdan» - Qobda atandy.

«Keıbir aýdandar stýdenttik qurylys jasaǵyn tıisti jumyspen qamtamasyz ete almady. ıAǵnı, daıyndyq barysynda aldyn ala josparlaý durys bolmady nemese múlde josparlaǵan joq. Bul - jergilikti atqarýshy organ basshylaryna aıtylǵan syn. Alǵa, Baıǵanın, Yrǵyz, Qarǵaly, Muǵaljar, Hromtaý aýdanynyń ákimderi osy olqylyqtardy aldaǵy maýsymda qaıtalamaýy tıis. Aqtóbe qalasy boıynsha merdiger kompanııanyń esepshoty buǵattalyp, jastarǵa ýaqytyly jalaqy tólenbedi. Bul jerde jastardyń kinási joq. Tapsyrma ýaqytyly oryndalsa, sapasyna syn bolmasa eńbekaqy ýaqytyly tólenýi tıis», - dep atap ótti oblys ákimi Ońdasyn Orazalın.

Óńir basshysy aldaǵy jyldary mundaı qatelik qaıtalansa, jaýapty qyzmetkerlerdiń jazalanatynyn aıtty. Sonymen qatar «Jasyl el» jasaǵyn jumysqa aparý, úıine qaıta jetkizý jaıy da kelesi jyly qaralady.

«Jasyl el» baǵdarlamasy - jastarǵa, sonyń ishinde stýdentterge jasalyp jatqan úlken múmkindik. Ýaqytty tıimdi paıdalanady, ata-anaǵa qamqor bolady, tabys tabady. Jastar jylynda kóptegen is atqaryldy. Kásip ashýǵa nesıe, granttar bólindi. Osy is ári qaraı jalǵasyn tabýda. Sonyń ishinde jastardy ata kásibimiz mal sharýashylyǵyn zamanaýı tehnologııalardy qoldana otyryp damytýǵa shaqyramyn. Meniń óńir turǵyndaryna aıtqan «qalany janǵa, dalany malǵa toltyraıyq» degen bastamamdy belsendi qoldaısyzdar dep úmit artamyn», - dedi ákim.