Aqtóbe ákimi orynbasarynyń aqtalýy: Múliktiń talan-taraj bolǵany dáleldenbegen
2020 jyldyń sáýir aıynda Aqtóbe qalasy ákiminiń orynbasary Jangeldi Áýbákirov ustalyp, Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha tergeý júrdi.
Al 2021 jyldyń maýsym aıynda Aqtóbe qalalyq № 2 sotynda qala ákiminiń orynbasary Jangeldi Áýbákirov, qalalyq turǵyn úı – kommýnaldyq sharýashylyq bólimi basshysynyń mindetin atqarýshy Nurlan Dosov, merdiger mekeme basshysy S.Janasbaev, bas esepshi D.Dúısembı, jeke kásipker N.Mustafınge qatysty qylmystyq is qaraldy. Jańa jyl kezinde bezendirý jumystaryna bólingen aqsha talan-tarajǵa túsip, memleketke 90 mln teńgeden astam zalal kelgeni aıtyldy.
«Sot Dosov pen Ábýbákirovti 7 jylǵa, Janasbaev pen Mustafındi 5 jylǵa bas bostandyǵynan aıyrý jazasyn taǵaıyndady. Dúısembıge 6 jylǵa bas bostandyǵynan aıyrý jazasyn taǵaıyndady. Onyń jas balasy bolýyna baılanysty jazasyn óteýdi 5 jylǵa keıinge qaldyrdy», - dep habarlady №2 qalalyq sottyń baspasóz qyzmeti.
Arada bir jyldan astam ýaqyt ótkende Aqtóbe oblystyq sotynyń qylmystyq ister jónindegi sot alqasy aqtaý úkimin shyǵardy.
«Sot otyrysynda aıyptaýshy tarap sottalýshylardyń senip tapsyrylǵan bóten múlikti qandaı jolmen asa iri mólsherde talan-tarajǵa salǵanyn dáleldeı alǵan joq. Sotqa deıingi tergep-tekserý organdary sottalýshylardyń kinásin tolyq dáleldeıtin aıǵaqty usynbaǵandyqtan sot sottalýshylardy kinásiz dep tanydy. Budan basqa apellıatsııalyq satydaǵy sot QPK-niń 170-babynyń 6-bóligine sáıkes «Aqtóbe qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi» MM-niń materıaldyq zalaldy óndirip alý týraly azamattyq talap aryzyn qaraýsyz qaldyrdy. Qylmystyq protsesýaldyq kodekstiń 4-taraýyna sáıkes A., D., D., D. jáne M. qylmystyq protsesti júrgizýshi organnyń zańsyz is-áreketterinen soń ońaltý jáne shyǵyndy ótetýge quqyǵy bar. Apellıatsııalyq úkim zańdy kúshine endi», - dep habarlady oblystyq sottyń baspasóz qyzmeti.
Aıta keteıik, sot otyrysy kezinde eks-ákim Mavr Abdýlın de kýáger retinde shaqyrylǵan. Ol sotta qala ákiminiń orynbasary Jangeldi Áýbákirov pen qalalyq turǵyn úı – kommýnaldyq sharýashylyq bólimi basshysynyń mindetin atqarýshy Nurlan Dosovqa jańa jyldyq bezendirý úshin aqsha qarastyrýdy tapsyrǵanyn aıtty. Ózi únemi bul jumysty baqylap otyrǵan. Sol jyly bıýdjetten 100 mln teńge bólinip, qalada túrli bezendirý jasalǵan.
Aıta keteıik, keshe m úlikti talan-tarajǵa saldy dep aıyptalǵan Aqtóbe ákiminiń burynǵy orynbasary aqtalǵanyn jazǵan edik.
