Aqtóbe ákimi óńirde jalaqynyń tómen ekendigi týraly aıtty
AQTÓBE. QazAqparat – Aqtóbede eńbekaqy respýblıkalyq kórsetkishten tómen. Qazaqstannyń batys aımaǵy boıynsha da eń azy Aqtóbede. Bul týraly oblys ákimi Ońdasyn Orazalın esep berý kezdesýinde aıtty, dep habarlaıdy QazAqparat tilshisi.
«Batys Qazaqstan aımaqtary boıynsha jalaqy eń tómen jalaqy Aqtóbede. Osy baǵytta kásiporyn basshylarymen kezdesý ótkizip, jumys atqaryldy. Nátıjesinde munaı-gaz, ken óndirý, qyzmet kórsetý salasynda ósim baıqalady. 2019 jyly oblystyń 1400-den astam kásiporyn qyzmetkerleriniń eńbekaqysyn orta eseppen 15 paıyzǵa arttyrdy. Jumys jalǵasady. «SNPS-Aqtóbemunaıgaz», «QazHrom» TUK» AQ men servıstik kompanııalar arasyndaǵy jalaqy ósirý jumysy jalǵasyn tabady», - dedi oblys ákimi Ońdasyn Orazalın.
Aıta keteıik, Aqtóbede ótken jyly ortasha jalaqy 153 myń teńgege jetti. Ótken jyly jeltoqsanda 33 myńǵa jýyq aqtóbelik jalpy somasy 2,6 mlrd teńgege syıaqy aldy.
«Ádette eń tómengi jalaqyny aýyl sharýashylyǵy salasyndaǵy jumysshylar alady. Mal baǵatyndardyń tabysy az. Sol sebepti qoıshy, baqtashy tapshy. Únemi habarlandyrý beredi. Eshkim barǵysy kelmeıdi. Keıde 50-60 myń teńgeniń ózin sharýa qojalyqtary durys tólemeıdi. Ómirde kezdesetin jaıt. Kimge zııan? Aldymen sharýa qojalyǵy zardap shegedi. Durys eńbekaqy tólenbese urlyq-qarlyq bolady, mal ıt-qusqa jem bolady. Sonymen qatar, osy máseleni sheshýdiń jolyn tapqandar bar. Máselen, hromtaýlyq kásipker Serik Orazymbetov jumysshylaryn turǵyn úımen qamtamasyz etken, jalaqysy joǵary. Arasynda jumysshylaryn qul sekildi jumsap, aqsha tólemeıtinder de kezdesedi», - dedi Ońdasyn Orazalın.
