Aqtóbe ákimi Mustafa Shoqaı sýretin alyp tastaý sebebin túsindirdi
AQTÓBE. QazAqparat - Mustafa Shoqaıdyń sýreti óz kóshesine salyndy. Biraq sýret salýshylar qalalyq komıssııanyń ruqsatyn almaǵan. Bul týraly Aqtóbe qalasynyń ákimi Іlııas Ispanov baspasóz máslıhatynda aıtty, dep habarlaıdy QazAqparat tilshisi.
Keshe Aqtóbedegi Batys-2 aýdanynda Mustafa Shoqaıdyń sýreti óshirilgeni týraly jazǵan bolatyzbyz. Búgin jýrnalıster aldynda esep bergen qala ákimi Іlııas Ispanov sýrettiń salynýy men ony óshirýdiń negizgi sebebin túsindirip berýge tyrysty.
«Ótken jyldyń jeltoqsanda QR Táýelsizdiginiń 25 jyldyǵyna oraı Alash qaıratkerlerine kóshe ataýy berilgen bolatyn. Sonyń biri - Mustafa Shoqaı. Kóshe keń, eki jolaqty. Negizgi zańdylyq boıynsha qala kóshelerine ataý berý usynysy aldymen turǵyndardan túsedi, keıin jergilikti atqarýshy organ usynysty onomastıkalyq komıssııaǵa berip, talqylaıdy. Osy jolmen kóshe ataýy berildi. Iá, Mustafa Shoqaıdyń sýretin bilemiz, sony salyp jatqan ýaqytta kórgenbiz. Ár azamattyń sýretin úlken ǵımarattyń syrtyna salý tártibi bolady. Tártipke baılanysty kelisimdi alyp, sodan keıin ǵana sýret salý kerek. Nemese merdiger kompanııalar sýret salǵysy kelgen kezde qalanyń qurylys keńesine syrtqy pishinin aldyn ala kelisip alady»,- dedi qala ákimi Іlııas Ispanov.
Baspasóz máslıhatynda qala ákimi Mustafa Shoqaı týraly mektep jasynan biletinin, birtýar azamattyń el úshin jasaǵan eńbegi ushan-teńiz ekenin aıtyp, aqtaldy.
«Eger keshegi jańbyrdan sýret zardap shegip, shyǵynǵa ushyramaǵanda biz qujattaryn qosymsha ázirlep, tirkeýge alatyn edik. Biraq ol sýret talapqa saı emes. Sáýletshilerdiń aıtýyna qaraǵanda, ol kisiniń sýretine týra kelmeıdi. Qoıylǵan ólshemi de durys emes. Qalamyzda qalaǵan adam óziniń týysynyń, ózi qalaǵan nársesin salatyn bolsa, onda bizdiń qalamyz qandaı jaǵdaıda bolatynyn elestete berińiz. Áleýmettik jelini qaradym. Adamdar ár nárseniń astaryn, tipti jamandyqty izdegen. Biz eshqashan ol kisilerge qarsy bolǵan joqpyz, qarsy bolmaımyz. Memleket ol kisilerdiń (Alashorda - avt.) 100 jyldyǵyn ótkizeıin dep otyr. Bizdiń bar oıymyz, basqa elge mazaq, kúlki bolmas úshin zańǵa sáıkes jasatýymyz kerek ǵoı. Sýretin ǵana emes, eskertkishin de salyp qoıýǵa múmkindigimiz bar»,- dedi qala ákimi І.Ispanov. Keıin suraq qaıta qoıylyp, ákim shaıtan sýreti úı qabyrǵasyna salynsa qalaı beıjaı otyra alasyzdar dep jýrnalısterden surady.
«Sýret Mustafa Shoqaıdyki bolǵany úshin óshirilgen joq. Ol jerde basqa bir sýret tursa ol da óshetin edi. Ózimiz turyp jatqan úıdiń syrtyna shaıtannyń sýretin salyp qoısa, úndemeı otyramyz ba? Astaryn izdemeńizder. Ol jerde qaıtadan Mustafa Shoqaıdyń sýretin nemese basqa alash qaıratkerleriniń sýretin salýymyz múmkin. Muny qala komıssııasy sheshedi. Ol kisiniń atyna qarsy bolsaq, kóshe aty berilmes edi»,- dedi І.Ispanov.
Aıta keteıik, Aqtóbe qalasy boıynsha Alash qaıratkerleriniń esimi 20 kóshege berilgen. Qala ákimi baspasóz máslıhatynda sol jıyrma adamnyń aty-jóni esinde joq ekenin aıtyp aqtaldy.
