Aqtóbe ákimi kósheniń sánin keltirý úshin mıllıondarǵa turǵyzylǵan aıaldamalardy alyp tastady
AQTÓBE. QazAqparat - Aqtóbe qalasynda ótken jyly árqaısysy 1 mıllıon 600 myń teńge bolatyn aıaldamalar turǵyzylǵan bolatyn. Qala ákimdigi bıyl bárin qaıta alyp tastap, ornyna birkelki aıaldamalar qondyryp jatyr, dep habarlaıdy QazAqparat tilshisi.
Aqtóbe qalasy ortalyǵyndaǵy aıaldamalar ótken jyly ǵana jańartylǵan bolatyn. Bıyl taǵy da ózgertilip jatyr. Turǵyndar óz qarsylyqtaryn bildirip, áleýmettik jeli arqyly bıýdjet qarjysynyń ysyrap bolǵanyn jazyp jatyr. Bul jaıdan Aqtóbe qalasynyń ákimi Іlııas Ispanov habardar eken.
«Ótken jyly USB porty bar 10 aıaldama satyp alyndy. Bári qońyr tústi boldy. Artyqshylyǵy telefon qýattaýǵa múmkindik bar edi. Aıaldamalardy baqylaıtyn kamera joq, adamdar qaıta-qaıta syndyryp tastady. Sonymen qatar, qalalyq sáýlet otyrysynda Ábilqaıyr han jáne Moldaǵulova dańǵyldaryna arnap birkeldi aıaldama pavılonyn qoıý týraly sheshim qabyldap, ótken jyly qondyrylǵan aıaldamalar alynyp tastaldy. USB porty bar aıaldamalardy basqa kóshelerge qoıamyz»,- dedi qala ákimi Іlııas Ispanov
Aıta keteıik, Aqtóbe qalasynda 500 aıaldama bar bolsa, onyń 197-de múlde oryn bekitilmegen, pavılon ornatylmaǵan.
«Qalanyń bas dańǵyldaryna birkelki ólshemdi aıaldama pavılonyn qondyryp jatyrmyz. Turǵyndar kishkentaı dep te aıtyp jatyr. Biraq adam aıaldamaǵa kútý úshin emes, avtobýsqa minip ketý úshin barady. Avtobýstardy ýaqtyly júrgizsek, kútýdiń qajeti joq»,- dedi qala ákimi І. Ispanov.
