Aqtóbe ákimi qaıyrymdylyq qorynyń jetekshisine «jeleznyı nerv» tiledi
AQTÓBE. QazAqparat - Aqtóbedegi tasqyn kezinde 867 úıge sý kirip, 86 úı qulap qaldy. Zardap shekkenderge kómek «Qolǵanat Aqtóbe» qory arqyly berilip jatyr. Áli 300-den astam adam ózine tıesili kómekti kútip otyr, dep habarlaıdy QazAqparat tilshisi.
Aqtóbedegi sý tasqyny kezinde qurylǵan «Qolǵanat Aqtóbe» qorynda 124 mıllıon teńgeden astam aqsha bar . Zardap shekkenderdiń aryzyn qabyldaý, aqsha bólý jumysy kún saıyn júrgiziledi.
"Sý tasqyny kezinde baspanasy qulap, zardap shekkenderge 10 páter berildi. Páterdiń beseýi qalalyq ákimdik balansynan, beseýi demeýshilerdiń kómegimen tabys etildi. Alǵashqy kezde oblys ákimi Berdibek Saparbaev ár aýdanǵa tapsyrma berip, kómek kórsetý týraly aıtqan bolatyn . Sonymen qatar, baspanasy qıraǵandarǵa jer berildi. «Qolǵanat Aqtóbe» qory arqyly 362 adamǵa kómek kórsetildi. Qazaqstan halqy, tipti reseılikter de qoldaý kórsetýde. Qor basshylyǵy ýaqytpen sanaspaı jumys istep jatyr. Sol úshin alǵys bildiremiz. Bastysy sizderdiń «nervterińiz jeleznyı» bolyp, shydamdylyq pen meıirbandylyq kúsheıe bersin",- dedi Aqtóbe qalasynyń ákimi Іlııas Ispanov.
Qala basshylyǵy buqaralyq aqparat quraldarynda aıtylǵan 70-100 myń teńgelik kómekter týraly óz pikirin bildirdi.
«Qorǵa adamdar bir kúndik jalaqysyn aýdardy. Sondyqtan ár tıynyna deıin sanaýly. BAQ-ta «100 myńnan artyq bermeıdi» dep aıtyp jatyr. Bári shyǵynǵa baılanysty. Múmkindiginshe jınalǵan qarjyny barlyǵyna jetkizsek dep oılaımyn. Áli de 340-qa jýyq azamat bar. Baspanasyn baǵalaýshylarǵa qaratyp, sheshimin kútip otyrǵan azamattar bar. Biriniń ýaqyty bolmaı jatsa, ekinshisiniń ıesi saıajaıda turmaıdy. Komıssııa bárin qarap jatyr. Únemdi jumsap, bárine jetkizý ońaı jumys emes. Mundaı qıyndyq endi qaıtalanbasyn»,- dedi Іlııas Ispanov.
Aıta keteıik , buǵan deıin zardan shekken otbasylardyń keıbirine 70 myń teńge berilgenin aıtqan bolatynbyz.
